काठमाडौंका सम्पादकहरु बोलाएर दिउँसो केपी ओली भन्दै थिए, मलाई अब सत्तामा बस्न रहरै छैन । विपक्षी पार्टीहरु आउँछन् भने उनीहरुलाई खुला दिलले सहयोग गर्छु । पत्रकार सम्मेलनको प्रत्यक्ष प्रसारण हेरिरहेका एकजना साथीले भन्दै थिए, ‘प्रधानमन्त्री यति खुलेर कुरा गरेका छन् । कुनै लप्पनछप्पन छैन । खुलस्तै बताएका छन् । संवैधानिक अड्चन ल्याउने आफ्नो कुनै मनसाय छैन भनेकै छन् ।’ तर जसै पत्रकार सम्मेलन सकियो, प्रधानमन्त्री ओली सिधै शीतल निवास पुगे प्रधानमन्त्रीका लागि दरखास्त हाल्न । विपक्षी दलहरु पुग्नु अगावै उनी शीतल निवास पुगिवरि १ सय ५३ सांसदको समर्थन आफूसँग रहेकाले अबको प्रधानमन्त्री फेरि आफैं हुनुपर्ने जिकीर गरिसकेका थिए । त्यसपछि बल्ल पुगेका थिए १ सय ४९ जनाको हस्ताक्षर लिएर विपक्षी दलहरु । विभिन्न आकलन भए । अब लगत्तै दउवा प्रधानमन्त्री हुन्छन् पनि भनियो । कहाँ हुनु ओलीले कुनै हालतमा छाड्दैनन् पनि भनियो । अनि राष्ट्रपतिको निर्णयमा नै भरपर्छ पनि भनियो । त्यही अनुमानका बीच मध्यरातमा राष्ट्रपति कार्यालयबाट विज्ञप्ति आयो, दुवैको दाबी बदर भयो भनेर । उता प्रम ओली सुतेकै थिएनन् । तत्काल मन्त्रिपरिषद बैठक बोलाए, संसद विघटन र चुनावको मितिसमेत तोकेर सिफारिस गरे । सिफारिस तुरुन्तै सदर भयो । अघिल्लो दिनका सांसद भोलिपल्ट उठ्दा त पदविहीन बने ।

प्रधानमन्त्री ओलीका पछिल्ला कदमहरु हेर्दा मुलुकको राजनीतिक भविष्य अब अन्धकारतिर गयो भन्ने प्रष्ट हुन्छ । के मन लागेको थियो प्रचन्डसँग पार्टी एकता गरे, के मन बिग्रियो एकता त भंग भयो नै पूरै मुलुकलाई नै प्रयोगशाला बनाएर भताभुंग पारे । उनलाई लाग्दो हो, म प्रधानमन्त्री हुँ, म शासक हुँ, मसँग अधिकार छ । हो उनीसँग अधिकार छ । तर अधिकार प्रयोग गर्ने विवेकले हो सनकले होइन । जसरी संसदलाई खेलौना बनाएर पूरै मुलुकलाई क्रीडास्थल बनाएका छन् प्रधानमन्त्री ओलीले, यसको मूल्य हामी नेपालीका लागि भारी पर्नेछ । माथि प्रसंग आएको थियो, प्रधानमन्त्री ओलीको फरासिलो र नरमपनको । इतिहास पल्टाएर हेर्ने हो भने मनमा वैरभाव साँध्नेहरु बाहिर बडो मिजासिलो भएर बोल्न सक्छन्, हो कि झैं पारेर बोल्न सक्छन् । प्रधानमन्त्री ओलीमा यही खुबी छ ।

मन्त्रिपरिषदको सिफारिसमा राष्ट्रपति विद्यादेवी भण्डारीले मध्यरातमा संसद विघटन गरिन् । चुनावमा मितिसमेत तोकिदिइन् । प्रजातान्त्रिक पद्धतिमा चुनावसँग डराउनु हुँदैन । तर अहिले बेला चुनावको होइन् । नागरिकहरु अक्सिजन नपाएर ज्यान गुमाइरहेका छन् । सत्ताधारीहरु भने नागरिकको स्वास्थ्यप्रति बेप्रवाह छन् । कुर्सीबेगर एकछिन रहन हुँदैन भन्ने लागेको छ उनीहरुलाई । प्रधानमन्त्री ओलीको पछिल्लो गतिविधिका कारण अहिले संघीयता नै धरापमा परेको छ । अब केन्द्रको रोग फेरि प्रदेशमा सर्नेछ । प्रदेशका संसदहरु विघटन हुनेछन् । अनि फेरि चुनाव घोषणा हुनेछ । बिचरा ! नेपाली नागरिकहरु बेलगाम नेताहरुको नाटक हेर्न बाध्य छन् ।