भारत र पाकिस्तानबीचको एक दिवसीय क्रिकेट सिरिज रद्द भएपछि अर्को वर्ष न्युजिल्याण्डमा हुने महिला एक दिवसीय क्रिकेटमा भारत छनोट भएको छ ।

पाकिस्तानविरुद्धको छनोट सिरिज भारत सरकारले खेल्न अनुमति नदिएपछि रद्द भएको थियो । भारत र पाकिस्तानबीचको एक दिवसीय सिरिज गत वर्षको जुलाई र नोभेम्बरमा तय भएको थियो । भारत सरकारले पाकिस्तानसँग खेल्नका लागि अनुमति नै दिएन । सिरिज रद्द भएपछि दुवै टिमले समान अंक लिएका छन् ।

भारत र पाकिस्तानबीचको राजनीतिक समस्याका कारण दुईपक्षीय सिरिजहरु हुन सकेका छैनन् । दुवै देश आइसीसीको इभेन्टमा मात्रै खेल्दै आएका छन् । सिरिज रद्द भएपछि अस्ट्रेलिया ३७ अंकसहित शीर्ष स्थानमा रहँदै विश्वकपको छनोट पार गर्न सफल बनेको छ ।

यस्तै, इङ्ल्याण्ड २९ अंक, दक्षिण अफ्रिका २५ अंक र भारत २३ अंकसहित शीर्ष ४ स्थानमा आफूलाई सुरक्षित राखेको हो । आइसीसीले शीर्ष ४ मा रहेका टिमलाई विश्वकपमा सामेल गराउनेछ । अरु टिमको भने पछि तय हुनेछ ।

अब, श्रीलंका, पाकिस्तान र वेस्टइण्डिजका साथै बंगलादेश आयरल्याण्ड र इस्टर्न रिजन विजेता थाइल्याण्ड, जिम्बाब्बे, पपुवान्युगिनी, अमेरिका र नेदरल्याण्ड्सले क्वालिफायर म्याच खेल्नु पर्नेछ । क्वालिफायर म्याच ३ देखि १९ जुलाईसम्म श्रीलंकामा हुनेछ । तर, अहिलेको कोरोना भाइरसको महामारीका कारण यो प्रतियोगिता पनि प्रभावित हुने संभावना बढेको छ ।