तनहुँ १२ साउन । तनहुँ भानुनगरपालिका–२ ठूलो बगैंचामा चितुवाको आक्रमणबाट एक बालक गम्भीर घाइते भएका छन् ।

चितुवाको आक्रणबाट सोही स्थान निवासी ७ वर्षीय हेमराज सुनार घाइते भएका हुन् । घरनजिकैको बारीको पाटामा रहेको शौचालय जादैँगर्दा उनलाई चितुवाले आक्रमण गरेको जानकारी जिल्ला प्रहरी कार्यालय तनहुूँका प्रहरी प्रमुख एवं प्रहरी उपरीक्षक विनोद सिलवालले जानकारी दिए ।

चितुवाले सुनारको ढाड र घाँटीमा चित्थोरेपछि उपचारका लागि डुम्रे स्थित लक्ष्मी अस्पताल लगिएको भएपनि त्यहाँ उपचार हुन नसक्दाँ थप उपचारका लागि चितवन स्थित भरतपुर मेडिकल कलेज लगिएको छ ।

पछिल्लो समय भानु नगरपालिकाका केही वडामा चितुवा र भालुले स्थानीयलाई आक्रमण गर्दै आएको छ, । जिल्ला प्रशासनले कार्यालय तनहुँले एक विज्ञप्ति प्रकाशित गर्दै घाँसदाउरा गर्न जंगलमा जाँदा स्थानीय वासीलाई उच्च सतर्कता अपनाउन अग्रह गरेको छ । प्रमुख जिल्ला अधिकारी रुद्रप्रसाद पण्डितद्वारा हस्ताक्षरित विज्ञप्तिमा रातीको समय र जंगलमा जाँदा उच्च सतर्कता अपनाउन आग्रह गरिएको हो ।

जिल्ला वन डिभिजन कार्यलय तनहुँका प्रमुख केदार बरालले विगतका दिनमा भानुनगरपालिकामा चितुवा र भालुको आक्रमणबाट ६ जनाले ज्यान गुमाइसकेको जानकारी दिए । स्थानीयहरुलाई चनाखो गराउने उदेश्यले विभिन्न खाले चेतनामुलक पर्चा,पोष्टर ,पम्पेलेट वितरण गर्नुको साथै विद्यालयका पुगेर विद्यार्थीलाई समेत सचेत गराउने काम भइरहेको बताए । जंगल फडानी र जनसंख्या वृद्धिका कारण वन्यजन्तुले खानेकुरा नपाउँदा मानिसलाई आक्रमण गर्न थालेको आशंका बरालले गरेका छन् ।

अन्जनराज न्यौपाने