पोखरा । पूर्वी नवलपरासीको देवचुलीमा आइतबार भएको बलेरो दुर्घटनामा ७ जनाको ज्यान गएको छ ।

जिल्ला ट्राफिक प्रहरी कार्यालयका अनुसार जीपमा रहेका चालकसहित ७ जनाकै निधन भएको छ । मृतक सबैको सनाखत भइसकेको प्रहरीले जनाएको छ ।

घटना स्थलमै ३ महिलासहित ६ जनाको र अर्का एक जनाको उपचारका क्रममा मृत्यु भएको थियो । जिल्ला प्रहरी प्रमुख एसपी बेदबहादुर पौडेलका अनुसार दुर्घटनामा मृत्यु हुनेमा पूर्वी नवलपरासी बौदीकाली गाउपालिका वडा नम्बर ६ का २९ वर्षका चालक छ बहादुर आलेमगर, कुमारी रानामगर, टेकमान वाटकी मगर,कमला वाटकी र बुलिङटार गाउपालिकाकी १२ वर्षकी करिश्मा ठाडा मगर छन् । मध्यबिन्दु नगरपालिका वडा २ मदनपुर निवासी १८ वर्षका चिरन अर्यालको र कावासोती वडा न १६ बस्ने बर्ष १७ को अस्विन गैरेको मृत्यु भएको हो ।

बौदीकाली गाउपालिकाको माझडाँडाबाट महेन्द्रराजमार्गको दल्दले बजारतर्फ आउँदै गरेको लु१ज ३२७० नम्बरको बलेरो जिप दुर्घटनामा परेको हो ।