पोखरा । बाल गृहमा बसेका तर पहिचान नखुलेका बालबालिकालाई समय पुगेपछि नागरिकता दिन सहज गराउनुपर्ने गण्डकी प्रदेशकी सामाजिक विकास तथा स्वास्थ्य मन्त्री सुशीला सिम्खडाले बताएकी छन् ।

पोखरा लेकसाइडस्थित रेन्बो चिल्ड्रेन होम नेपालको वार्षिक साधरणसभा सामाजिक लेखाजोखा तथा सम्मान कार्यक्रमलाई सम्बोधन गर्दै मन्त्री सिम्खडाले घेरै बालबालिकाहरु हुर्किएपछि नागरिकता लगायतका कागज नभएको कारण उनी धेरै सुविधाबाट बञ्चित हुनुपरेको धारणा राखिन् ।

उनले आफूले नागरिकता सहज दिलाउने व्यवस्थाका लागि सरकारसँग पहल गर्ने जानकारी पनि दिइन् । मन्त्री सिम्खडाले संस्था चलाउन धेरै चुनौती रहेको स्पष्ट्र पार्दै चिल्ड्रेन होमले समाजमा उत्कृष्ट कार्य गरेको भन्दै धन्यवाद दिइन् ।

पोखरा ६ का वडाध्यक्ष विष्णुबहादुर भट्टराईले स्थानीय तहको तर्फबाट संस्थाका गतिविधिमा सक्दो सहयोग गर्ने प्रतिबद्धता जनाए । उनले बाल गृहबाट असल नागरिक उत्पादन भएको जनाउँदै उनीहरुलाई समाजमा स्थापित गर्न राज्यले ठोस पहल लिनुपर्ने बताए ।

त्यस अवसरमा नमूना आमा समूह अध्यक्ष जुना अधिकारी, नमुना आमा समूहको पूर्व अध्यक्ष मिठुदेवी अधिकारी, बालगृहकी दिपा खत्री लगायतले पनि भनाई राखे ।
कार्यक्रमका बीच पत्रकार सन्देश श्रेष्ठ, एसइई उत्तीर्ण गर्ने तथा उच्च शिक्षा पास भएका सदस्यका छोराछोरीलाई सम्मान पनि गरियो ।