पोखरा । नवआदर्श सामुदायिक विकास समाज (नाकोड्स) को आयोजनामा शुक्रबारदेखि सुरु भएको लामाचौर कप राष्ट्रिय महिला तथा पुरुष भलिबल जारी छ । राउन्ड रोबिन लिगका आधारमा खेलाइएको प्रतियोगितामा आइतबार ४ खेल भए । तेस्रो दिनसम्मको खेलका आधारमा महिलातर्फ चन्द्रगिरी नगरपालिका न्यु डायमन्ड र पुरुषतर्फ नेपाल पुलिस क्लब शीर्ष स्थानमा छन् ।

प्रतियोगितामा ४ टिम सहभागी रहेको महिलातर्फ ३ खेल खेलेको डायमन्डले ६ अंक जोडेको छ । आइतबार भएको खेलमा नेपाल पुलिस क्लबसँग ३–२ को सेटमा पराजित भएकाले डायमन्डले एक अंक जोडेको हो । पहिलो सेट २५–१८ ले जिते पनि त्यसपछिको २ सेट लगातार २५–२० र २५–१४ ले पुलिसलाई सुम्पिएको थियो भने तेस्रो सेटमा २५–२१ ले सेट जित्दै खेलमा फर्किएको थियो । फाइनल सेटमा १५–१२ ले पराजित हुँदै पुलिसलाई २ अंक सुम्पिएको थियो । त्यस अघि डायमन्डले एभरेस्टलाई ३–० पराजित गर्दै ३ र एपिएफलाई ३–२ को सेटमा हराएर २ अंक जोडेको थियो ।

प्रतियोगितामा २/२ खेल खेलको नेपाल पुलिस ५ अंकका साथ दोस्रो र ४ अंकका साथ एपिएफ तेस्रो स्थानमा छ । आइतबार भएको खेलमा पुलिसले डामन्डलाई पराजित गर्दै २ अंक जोडेको हो भने शनिबार भएको खेलमा एभरेस्टलाई ३–० को सेटमा हराएर ३ अंक जोडेर बसेको थियो ।

एपिएफले एभरेस्ट भलिबल क्लब बुटवललाई २५–१६, २५–१४ र २५–१७ को सोझो सेटमा हराएर ३ अंक जोडेको हो भने अघिल्लो दिनको खेलमा डायमन्डसँग १ अंक खोसेको थियो । प्रतियोगितामा कुनै पनि खेल नजितेको एभरेस्ट अंक तालिकाको अन्तिम स्थानमा छ । आइतबार एपिएफ र पुलिस बीचको अन्तिम खेलमा दुवै टिमले २/२ सेट जितेर फाइनल सेटमा खराब प्रकाशका कारण सोमबारलाई सरेको छ । यी दुईबीचको खेल सोमबार सुरुबाटै हुने आयोजकले जानकारी दिएको छ ।

पुरुषतर्फ ५ सहभागिता रहेको प्रतियोगितामा नेपाल पुलिस क्लब ३ खेल जितेर ८ अंकका साथ शीर्षस्थानमा छ । पुलिसले मणिमुकुन्द भलिबल क्लब बुटवल र गलकोट स्पोर्टस् क्लबसँग ३/३ अंक जोडेको थियो । एपिएफसँगको खेलमा २ अंक बटुलेको थियो । पुलिसले आइतबार गलकोटलाई २५–१८, २५–२१ र २५–१४ को सोझो सेटमा हराएको थियो ।

७ अंक जोडेर गण्डकी प्रदेश दोस्रो स्थानमा छ । आइतबार गण्डकीले एपिएफलाई २३–२५, २५–२३, २५–२३ र २५–१९ को सेटमा हराएर ३ अंक जाडेको हो । त्योभन्दा अघि गण्डकीले गलकोटसँगको खेलमा ३ र मणिमुकुन्दसँगको खेलमा १ अंक बनाएको थियो ।

५ अंकका साथ मणिमुकुन्द चौथो स्थानमा छ भने कुनै पनि खेल नजितेको गलकोट अंक तालिकाको पुछारमा छ । राउन्ड रोबिन तालिकामा तेस्रो र चौथो स्थानमा रहने टिम तेस्रो स्थानका लागि प्रतिस्पर्धा गर्नेछ भने तालिकाको पहिलो र दोस्रो स्थानमा रहने टिम उपाधिका लागि भिड्ने प्रतियोगिताका टेक्निकल डेलिकेट अन्तर्राष्ट्रिय भलिबल रेफ्री टहलसिंह थापाले जानकारी दिए ।

सोमबार पुरुषतर्फ एपिएफ र मणिमुकुन्द, गण्डकी र पुलिस तथा महिलातर्फ एपिएफ र पुलिस खेल हुनेछ । महिलाको खेल पोखरा रंगशालामा बिहान ७ बजे हुने भलिबल रेफ्री थापाले जानकारी दिए ।

लामाचौर कप राष्ट्रिय भलिबल प्रतियोगितामा महिला र पुरुषतर्फ उपाधि विजेता, उपविजेता र तृतीय हुने टिमले क्रमश समान नगद १ लाख ५० हजार १ सय ११ रुपैयाँ, १ लाख १ सय ११ रुपैयाँ र ५० हजार १ सय ११ रुपैयाँका साथमा ट्रफी, मेडल र प्रमाणपत्र प्राप्त गर्नेछन् । त्यस्तै उत्कृष्ट विधागततर्फ समेत नगद पुरस्कार वितरण गरिने आयोजकले जनाएको छ ।