पोखरा । हेमजा साहित्य प्रतिष्ठान नेपालले १५८ औं मोती जयन्ती पूर्व सन्ध्यामा मोतीराम भट्टको व्यक्तित्व र कृतित्वबारे चर्चासहित गजल प्रशिक्षण दिएको छ ।
पोखरा प्रज्ञा प्रतिष्ठान कुलपति पद्मराज ढकालले कार्यक्रम उद्घाटन गर्दै मोतीराम भट्टले नेपाली भाषा साहित्यमा दिएको योगदानको तुलना नै हुन नसक्ने बताए । उनले देशको विकास निर्माण बाटाघाटा, पुलपुलेसा मात्र नभएर सभ्यता र संस्कृतिको संरक्षण पनि देश निर्माणको अभिन्न अंग भएको बताए । उनले प्रतिष्ठानमा महानगरका प्रमुख कार्यकारी अधिकृत सदस्यसचिव रहने व्यवस्थाले प्रतिष्ठानका गतिविधि सञ्चालनमा असहजता भएको गुनासो गरे ।
गण्डकी प्रज्ञा प्रतिष्ठानका परिषद् सदस्य कृष्णप्रसाद पौडेलले हेमजा साहित्य प्रतिष्ठान यस क्षेत्रको एउटा गौरवका रूपमा अगाडि बढेको देख्दा आफूलाई निकै खुसी लागेको धारणा राखे । मोतीराम भट्टको व्यक्तित्व र कृतित्वमाथि प्रकाश पार्दै अन्तर्राष्ट्रिय नेपाली साहित्य समाज अनेसास गण्डकी समिति महासचिव असफल गौतमले नेपाली भाषासाहित्य सिर्जना र संगठनका अलौकिक र प्रेरक आधिकारिक प्रतिभाकारूपमा मोतीराम भट्टलाई चिनाए । उनले मोतीराम भट्टले कोरेको भानुभक्त आचार्यको मुहारचित्र र नेपाली भाषामा पहिलो नेपाली गजल रेकर्ड गराउने गीतकार व्यक्तित्वलाई ओझेलमा पार्न नहुनेमा समेत जोड दिए ।
मुख्य प्रशिक्षक अनुराग अधिकारीले सिकाइ कहिल्यै पनि पूरा नहुने भएकाले भाइबहिनीले सिकेका कुरा दैनिक जीवनमा लागू गर्न साधनाको सधैं खाँचो रहने बताए ।
कार्यक्रम संयोजक सुनिल गायकले भाइबहिनीलाई गजलप्रति आकर्षित गर्न पाउँदा आफूलाई गौरवबोध भएको बताए ।
प्रतिष्ठानका सचिव परशुराम अधिकारीले प्रतिष्ठान स्थापनाको रजत वर्षमा वार्षिक नियमित कार्यक्रमबाहेक २५ फरक प्रकृतिका विशेष कार्यक्रमअन्तर्गत पोखरा प्रज्ञा प्रतिष्ठानको आर्थिक सहयोगमा नवौं कार्यक्रम मोतीराम भट्टको व्यक्तित्व तथा कृतित्वको परिचर्चा र गजल प्रशिक्षण राखेको बताए ।
हेमजा क्षेत्रका ४५ जना विद्यार्थी तथा गजल अनुरागी स्रष्टा साहित्यसेवीको सहभागिता रहेको कार्यक्रममा सहभागी सबैले गजल लेखेर प्रस्तुतसमेत गरेका थिए । प्रशिक्षार्थी सरिता थापा र मिजास विकले प्रशिक्षण फलदायी भएको बताए । अध्यक्ष बलराम पौडेलले भदौ २३ मा गजल प्रतियोगिता सफल पार्न सबैको सहयोगको अपेक्षा गरे ।