पोखरा ।तमुहरुको क्रियाशील २ संस्थाबीच एकता हुने भएको छ । पोखरा–९, नयाँबजारमा कार्यालय रहेको तमु धिं नेपाल र काठमाडौं मित्रनगरमा कार्यालय रहेको तमु ह्युल छोंज धिं गुरुङ राष्ट्रिय परिषद् एकीकृत हुने बिहीबार सहमति भएको हो ।

तमु धिं नेपालका तर्फबाट अध्यक्ष हुमबहादुर गुरुङ र तमु ह्युल छोंज धिं गुरुङ राष्ट्रिय परिषद्का उपमहासचिव मनोज गुरुङको संयोजकत्वमा एकताका लागि वार्ता समिति गठन गरिएको थियो ।

विश्वभरका तमुहरुलाई एकताबद्ध बनाउने लक्ष्यका साथ आगामी २ कार्यकाल एकीकृत संस्थाको नेतृत्व आलोपालो नेतृत्व गर्ने, आवद्ध संस्था समाजहरुको सम्पत्ति स्वायत्त रहने, एकता महाधिवेशनमा आवद्ध क्षेत्रीय समाजहरुबाट प्रतिनिधित्वको सुनिश्चित गर्ने र तमु ह्युल छोंज धिं गुरुङ राष्ट्रिय परिष्द्को चैत्र २७ र २८ गते चितवनमा हुने चौथो राष्ट्रिय महाधिवेशन हाललाई स्थगित गर्न आग्रह गर्ने वार्ता समितिले निर्णय गरेको छ ।

एकतालाई निष्कर्षमा पुर्‍याउन एकीकृत संस्थाको नाम र झन्डा चैत्र २७ गते पोखरामा हुने अर्को वार्तामा टुंगो लगाउने निर्णय भएको छ ।

तमु ह्युल छोंज धिं गुरुङ राष्ट्रिय परिषद र तमु धिं नेपालको एकताले विश्वभरका तमुहरुको एकतावद्धता, शक्ति आर्जन, अधिकार सुनिश्चिता र पहिचान स्थापित गर्न सघाउ पुग्ने अपेक्षा गरिएको छ ।