हेमजा, १४ माघ। हेमजा याम्दीस्थित पेमा छाल शाक्य गुम्बामा सोमवारदेखि भज्रकिलाया (देवताको नाम) महापूजा शुरु भएको छ।

२१४६ औं माटो सुँगुर ल्होसार अवसरमा शुरु पूजा एक हप्तासम्म चल्नेछ।

जसमा लामा पूजारी खेन्पो जाम्पा ढाक्पा तथा लोपोन नवाङ ढाक्पाले सहजीकरण गरिरहेका छन्।पूजामा गुम्बामा अध्ययनरत ७० जना लामा भिक्षु साथै अमेरिका ओहायोबाट स्टेफेन हायेसको नेतृत्वमा आएको ६ सदस्यीय टोली पनि सहभागी छ।

प्राणीहरुको सुःस्वाथ्य, शान्ति, एवं समृद्घिका लागि विगत वर्षदेखि नै पूजा गरिँदै आइएको गुम्बा व्यवस्थापन समिति महासचिव लोब्साङ छिरिङले जानकारी दिए। कुनै रोकावट नष्ट गर्न तथा ग्रहशान्तिका लागि पूजा फलदायी बन्ने विश्वास गरिएको छ।

बिहान ६ बजेदेखि दिउँसो साढे ४ बजेसम्म दैनिक पूजा हुने व्यवस्था मिलाइएको छ। अन्तिम दिन माघ २० गते भज्रकिलाया मुकुट नृत्य पनि देखाइने भएको छ। गुम्बामा यतिबेला मुस्ताङ, कास्की, रसुवा, सिन्धुपाल्चोक, धादिङ, ओखलढुङगा, डोल्पा, चितवन साथै दार्जलिङका एक सय २० जना लामा भिक्षुले बौद्घ शिक्षा लिइरहेका छन्।