पोखरा । पोखराका विभिन्न ठाउँबाट लागुऔषधसहित ४ जना पक्राउ परेका छन् । जिल्ला प्रहरी कास्की तथा मातहतका कार्यालयबाट खटेको प्रहरी टोलीले उनीहरुलाई लागुऔषध डाइजोपाम, फेनेरागन र नुर्फिनसहित पक्राउ गरिएको प्रहरीले जनाएको छ ।

कास्की अन्नपूर्ण गाउँपालिका स्थायी घर भई पोखरा खत्रीचोक इन्द्रमान गुरुङ (सन्तोष) को साथबाट डाइजोपाम ५३ एम्पुल, फेनेरागन ५३ एम्पुल र नुर्फिन ५३ एम्पुल गरी जम्मा १ सय ५९ एम्पुल लागु औषध बरामद गरेको छ ।

पोखरा १३ बाँझापाटनका विकास गुरुङको साथबाट डाइजोपाम २५ एम्पुल, फेनेरागन २५ एम्पुल र नुर्फिन २५ एम्पुल गरी जम्मा ७५ एम्पुल बरामद गरेको छ । गुरुङद्वयलाई कास्की जिल्ला अदालतबाट ७ दिनको म्याद थपी अनुसन्धान थालिएको छ ।

यस्तै, पोखरा २० भलामका सावन विकलाई डाइजापाम १७ एम्पुल, फेनेरागन १७ एम्पुल र नुर्फिन १६ एम्पुल गरी जम्मा ५० एम्पुलसहित कास्की प्रहरीले पक्राउ गरेको छ ।

पोखरा ३० घर बगालेटोल बस्ने कुमार गुरुङको साथबाट लागू औषध डाइजोपाम २८ एम्पुल, फेनेरागन ३० एम्पुल र नुर्फिन २८ एम्पुल गरी जम्मा ८६ एम्पुल बरामद गरेको छ । विक र गुरुङलाई अदालतबाट ६ दिन म्याद थप गरिएको छ ।