पोखरा । एउटा पुल बनाउन कति समय लाग्छ ? छिटो गरे केही महिनामै सकिन्छ । नभए पनि केही वर्षमा त पक्कै पूरा हुन्छ । कास्कीमा एउटा पुल निर्माण थालेको ९ वर्षसम्म पूरा भएको छैन ।
मादी गाउँपालिकास्थित घुम्लेमा मादी नदीमाथि बनाउन लागिएको पुल २०६९ सालमा सम्झौता गरिएको थियो । हालसम्म योजना पूरा भएको छैन ।
ठेकेदारको लापरबाही र सरकारको निरीहताले पुल निर्माणमा ढिलाइ भएको हो । यहाँ ७३ मिटर लामो पक्की मोटरेबल पुल बनाउन काठमाडौंको लोकप्रिय शंकरमाली जेभीले ठेक्का पाएको थियो । ३० महिनाको म्याद दिइएकोमा म्यादभित्र कम्पनीले काम नै सुरु गरेन । २०७२ माघमा पुल निर्माणको म्याद थपियो । थपिएको ६ महिनामा पनि काम नभएपछि पुनः अर्को ६ महिना थपेर २०७३ माघसम्म काम सक्न ताकेता गरियो । पछिल्लो पटक म्याद थपिएको पनि ५ वर्ष पूरा भइसक्यो तर पुल ठडिएन । ठेकेदारकै लापरबाहीले पुल समयमा नबनेको डिभिजन सडक कार्यालय पोखराले जनाएको छ ।
‘१० दिन काम गर्छ । १५ दिन भाग्छ । फकाउँछु र काम लगाउँछु,’ सडक डिभिजन कार्यालय पोखराका प्रमुख सुनिल पन्तले भने, ‘हामीलाई जसरी पनि काम चाहिएको हो । उसैको हातबाट सम्पन्न गर्ने बाहेक अरु विकल्प छैन । ठेक्का नतोडी अर्को ठेक्का लगाउन मिल्दैन । समस्या भयो ।’ यो वर्ष भने काम सकिने उनको विश्वास छ । यद्यपि अझै धेरै काम बाँकी नै छ । पटक पटक म्याद थप र ताकेता गर्दा पनि ठेकेदारले नटेरेको कार्यालयले जनाएको छ ।
कालिका–माझठाना हुँदै घुम्लेबाट मिजुरेडाँडादेखि लमजुङसम्म जोड्ने सडकका लागि यो पुल बनाउन लागिएको हो । पुल नबन्दा स्थानीयलाई आवतजावतमा समस्या परेको छ । ‘१२ मिटरको बाटो बन्दै छ । खोलामा पुल छैन । पुल भयो भने लमजुङदेखिका मान्छे यहि बाटो हिँड्छन्, मिजुरेका मीनबहादुर गुरुङले भने, ‘यहाँदेखि १ घन्टामै पोखरा पुग्छन् । छिटो बनिदिए खुसी हुन्छन् नि । न कारबाही गर्छ । न ठेकेदारले काम गर्छ । अन्यौल भयो ।’
जिल्ला समन्वय समितिका प्रमुख बैनबहादुर अधिकारीले धेरै दबाबपछि मात्रै ठेकेदारले काम गर्न थालेको बताए । ‘पुल बन्दैन कि भनेर जनतालाई चिन्ताको विषय बनेको थियो । अहिले काम फत्ते हुने अवस्थामा छ,’ उनले भने, ‘ठेक्का तोडाएर स्थानीय तहले काम गर्ने भनेपछि बल्ल ठेकेदार तात्यो । ५० प्रतिशत काम त १ वर्षको अवधिमा गरेको छ ।’
ठेकेदारले समयमा काम नगरेपछि डिभिजन सडकले जरिवाना लगाएको छ । ‘ठेक्का रकमको १० प्रतिशत जरिवाना लगाइएको छ । यो भनेको पनि निकै ठूलो कारबाही हो,’ कार्यालय प्रमुख पन्तले भने, ‘कि ठेक्का तोड्नु पर्यो । नत्र उसैले काम सम्पन्न गर्नुपर्ने हुन्छ ।’ पुल बनेपछि कास्कीको माझठाना, भाचोक, मिजुरेडाँडा, सैमराङ साथै लमजुङको पसगाउँ, भोँजेसम्मका नागरिकलाई सहज हुन्छ । घुम्ले नजिकै भगवतीटारमा पनि पक्की पुल बनिसकेको छ ।
ठेकेदारले कहिलेकाहीँ बर्खा लागेपछि सामान लगेर थुपार्ने र काम गरेजस्तो मात्रै गरेर पटक पटक बजेट निकासा लिँदै आएको छ । पुल निर्माणको काम बाँकी नै रहँदा करिब पूरै बजेट निकासा भइसकेको छ । ५ करोड ९ लाख रुपैयाँमा ठेक्का सम्झौता भएको थियो । ठेकेदारले २०७२ पछि मात्रै सबकन्ट्याक्टरलाई जिम्मा दिएर काम थालेको थियो । गाउँपालिकाले पनि पटक पटक ताकेता गर्यो । तर सुनेको नसुन्यै गरेर काम ढिलो भयो । पुल निर्माणको ठेक्का पाएको ठेकेदार कम्पनी मध्ये लोकप्रिय निर्माण सेवालाई सरकारले कालो सूचीमा राखेको थियो । ठेक्का मात्रै ओगट्ने र काम नगर्ने प्रवृत्तिका कारण धेरै ठेकेदार कम्पनी अहिले सरकारको निगरानीमा छन् ।
Related News
सम्बन्धित समाचार
भ्रष्टाचार नियन्त्रणमा सार्थक प्रयास भएन : धनराज गुरुङ
गण्डकीको संसद बैठक २३ गते ३ बजे बस्ने, मुख्यमन्त्री अधिकारी विश्वासको मत लिँदै
मुख्यमन्त्री अधिकारीले २३ गते विश्वासको मत लिने, राप्रपा विपक्षमै
सिद्ध र कालिका क्रिकेटको फाइनलमा
राप्रपाले साथ नदिने भएपछि अधिकारी सरकार संकटमा, अब के होला ?
hero news full width
मुख्य समाचार
लाटोकोसेरो संरक्षक राजु आचार्यलाई बेलायतमा अवार्ड
पाेखरामा कालो धुँवा फाल्ने गाडीका चालक कारवाहीमा
वैशाख २०, २०८१मजदुरलाई छैन मजदुर दिवस रौनक
वैशाख २०, २०८१गण्डकीमा संविधान भर्सेज सर्वोच्च
वैशाख २०, २०८१पोखराको अमरसिंहको बिजुली पसलमा आगलागी, १ करोडको क्षति
वैशाख २०, २०८१गण्डकी प्रदेशमा सत्ता राजनीति : प्रदेश सभा सदस्य ६०, बहुमत ३० ले पुग्ने !
वैशाख १९, २०८१