पोखरा, १५ असार । महिला लक्षित एक महिने मखमली जुत्ता–चप्पल बनाउने तालिम पोखरामा सम्पन्न भएको छ ।

आमा मिलन केन्द्रद्वारा संचालित उक्त तालिममा ४५ जनाको सहभागिता थियो । तालिमका प्रशिक्षार्थीलाई गण्डकी प्रदेश सामाजिक विकास मन्त्रालयका सचिव दीर्घनारायण पौडेल, पोखरा–८ का वडाध्यक्ष रुद्रनाथ बराल, संचारकर्मी दुर्गा अधिकारी र महिला अधिकारकर्मी तारा थापाले प्रमाणपत्र वितरण गरे ।

उक्त अवसरमा सचिव पौडेलले सीप विकासका लागि आमा मिलन केन्द्रसँग सहकार्य गर्ने प्रतिबद्धता व्यक्त गर्दै तालिमलाई जीवनोपयोगी बनाउन आग्रह गरे । पोखरा महानगरपालिका वडा नं ८ का वडाध्यक्ष रुद्रनाथ बरालले महिलालाई आत्मनिर्भर बनाउन सीप विकास तालिमको आवश्यक रहेको औंल्याए ।

कार्र्यक्रममा पृथ्वीराज शर्मा तिमिल्सिना, ध्रुवराज पौडेल,तारा थापा,दुर्गा केसी, दुर्गा अधिकारी र कमला श्रेष्ठ लगायतले शुभकामना मन्तव्य राखेका थिए । आमा मिलन केन्द्रकी अध्यक्ष इन्दिरा पौडेलको अध्यक्षतामा भएको उक्त कार्यक्रम उपाध्यक्ष निर्मला घिमिरेले स्वागत र कोषाध्यक्ष खुमा लम्सालले संचालन गरेकी थिइन् ।