दोस्रोपटक भएको स्थानीय तह निर्वाचन २०७९ बाट निर्वाचित भएर आएपछि हामीले गैँडाकोट नगरपालिका क्षेत्रभित्र पूर्वाधारका कामहरू तीव्र रुपमा गरिरहेका छौं । निर्वाचित भएर आएपछिको करिब यो २ वर्षमा हामीले सडक कालोपत्रसहित, उच्चस्तरीय ग्राबेल, सडकको नयाँ ट्रयाक खोल्ने, ग्राबेल गर्ने तथा सडकमा मोज्याक टायल बिच्छाउने काम गरेका छौं । सडकसँगै विद्यालय भवन, सामुदायिक भवन, सत्तल, किरियापुत्री भवन आदि संरचनाहरु निर्माण गरिएको छ । नगरपालिकाले कक्षा ५ सम्म निशुल्क शिक्षा पु¥याउने भनेर गरेको घोषणा हामीले पूर्णरुपमा कार्यान्वयन गरेका छौं । यस अवधिमा कक्षा ४, ५ र ७ मा स्थानीय पाठ्यपुस्तक छपाइ गरी वितरण गरिएको छ ।

हामीले चुनावताका गरेको प्रतिबद्धताअनुसार कामलाई निरन्तरता दिएका छौं । हामीले सक्ने काम गरिरहेका छौं भने केही काम संघीय सरकारको नीति नियमका कारण पूरा गर्न सकेका छैनौं । कृषितर्फ किसान सूचीकरण कार्यक्रम सञ्चालन गरि गैंडाकोट ७, ८ र ९ मा कार्य आरम्भ गरिएको छ । गैंडाकोट स्वास्थ्य चौकी र नगर अस्पतालमा प्रसूति सेवालाई प्रभावकारी बनाइएको छ । हामीले घरघरमा वृद्धभत्ता पु¥याउने भनेर चुनावी घोषणापत्रमा उल्लेख गरेका थियौं । तर, सरकारको नीतिका कारण त्यो पूरा गर्न सकेनौं ।

नगरपालिकाभित्रका सुकुमबासीलाई जग्गा प्रदान गर्ने गरी काम भइरहेको छ । भूमिहीन दलित, भूमिहीन सुकुमबासी, अव्यवस्थितहरु बसेकै ठाउँमा जग्गा दिने तयारी गरेर बसेका थियौँ तर केन्द्रमा सरकारको समीकरण परिवर्तन हुँदा जग्गा दिने काम अहिले नै पूरा हुने सकेको छैन । तर, उनीहरुलाई जग्गा दिनका लागि गर्नुपर्ने सबै प्रक्रिया पूरा भएर जग्गा नापजाँच गर्नमात्रै बाँकी छ । अब आउने आयोगले जग्गाको नापजाँच गरेर १८ वटै वडाका सुकुमबासीलाई जग्गा दिनसक्ने गरी तयारी गरेका छौं ।

धार्मिक र पर्यटन प्रवद्र्धनका लागि नगरपालिकाले समन्वय गरेर काम भइरहेको छ

नगरभित्रका सामुदायिक विद्यालय भवन निर्माणको काम भइरहेको छ । विकास निर्माणको काम द्रुत गतिमा भइरहेको छ । नगरपालिकासँगै रहेको आधारभूत स्वास्थ्य केन्द्रलाई ५ शय्याको अस्पताल बनाउने गरी काम भइरहेको छ । अस्पताल बनाउनका लागि भवनको शिलान्यास गरेर काम अघि बढिसकेको छ । भेडाबारीको नगर अस्पतालबाट नगरवासीहरुले बिमाको सेवा प्राप्त गर्ने वातावरण सिर्जना गरेका छौं । नगर अस्पतालमा गर्भवतीलाई राख्न आमा घर सञ्चालन गरिएको छ । सुत्केरी हुनुभन्दा केही दिन अगाडि गर्भवतीहरु त्यहाँ आएर बस्ने र सुत्केरी भएपछि ५ हजार रुपैयाँ दिएर पठाउने गरिएको छ ।

नगर अस्पतालको नयाँ भवन निर्माणको काम अहिले पुनः अघि बढेको छ । पैसा निकासा नहुँदा रोकिएको काम पैसा निकासा भएपछि भवन निर्माण काम अगाडि बढेको हो । अहिले भवनको भौतिक प्रगति ५० प्रतिशत भन्दा बढी भइसकेको छ । नगरलाई सफा र सुन्दर बनाउने हाम्रो तयारीस्वरुप गैंडाकोट–६ मा ल्यान्डफिल निर्माण गर्ने तयारी गरेका थियौँ । तर, फोहोर व्यवस्थापनमा राजनीतिक प्रतिशोध साँधियो । त्यहाँ स्थानीयले अवरोध गरेपछि हामीले ल्याण्डफिल बनाउने जग्गा अन्यत्र खोज्यौं । अहिले वडा नम्बर ७ मा ल्यान्डफिल साइट निर्माण गर्ने गरी तयारी अगाडि बढाएका छौं । त्यहाँ बन्ने ल्यान्डफिल साइटको लागि जनप्रतिनिधिको टोलीले कैलालीको धनगढी र रुपन्देहीको तिलोत्तमाको फोहोर व्यवस्थापनको काम अवलोकन गरेर आएका छन् । अब त्यहिँको सिको गरेर हामीले पनि फोहोरबाट मोहर प्राप्त गर्नेगरी काम गर्दैछौं ।

नारायणी नदीको किनारै किनार जैविक पर्यटकीय मार्ग निर्माण गर्नेगरी गुरुयोजना बनाएर काम अगाडि बढेको छ । नारायणी नदीकिनारमा तटबन्ध सहितको सडक निर्माणको काम सुरु गरिएको थियो तर, केन्द्रले बजेट नपठाउँदा काम अधुरो भएको छ । गैंडाकोटको वडा नम्बर ९ मा करिब ५ सय मिटर ड्यामसहितको सडक निर्माण भए पनि त्यो योजना निरन्तर भएको छैन । यद्यपि वहुवर्षीय योजना भएकाले बजेटको सुनिश्चितता भएर काम सुरु हुनेमा हामी विश्वस्त छौं । हाम्रो ऐतिहासिक धरोहर गैंडाकोट–११ मा पर्ने मुकुन्दसेन दरबार पुनः निर्माणका लागि बजेट विनियोजन गरेका छौं । गैंडाकोट–१ मा पर्ने मौलकालिका मन्दिरबाट पहाडको धुरी हुँदै बौदीकाली गाउँपालिकासम्म पदमार्ग निर्माणको तयारी थालिएको छ । आफ्नो पालिकामा पर्ने पदमार्ग आफैले निर्माण गर्न ८ वटै पालिकाबीच सहमति भएर महत्वपूर्ण योजना अगाडि सारेका छौं ।

गैंडाकोट नगरपालिकाभित्र समथर भागमात्रै नभएर सुन्तला फल्नेसम्मका पहाडी जमिन छन् । नगरभित्र सडकको सहज सञ्जाल विस्तारसँगै खानेपानी, कृषि, शिक्षा, रोजगारलगायतका विषयमा हामीले ध्यान दिएर काम गरेका छौं । यहाँको धार्मिक र पर्यटन प्रवद्र्धनका लागि नगरपालिकाले समन्वय गरेर काम गरिरहेको छ ।