स्याङ्जा । चिसापानी साना किसान कृषि सहकारी संस्थाले विद्यार्थीसँग वित्तिय साक्षरता अभियान सञ्चालन गरेको छ । हरिनास–२ चिसापानीस्थित उक्त सहकारीले वडाको महिमा माविका विद्यार्थीलाई पैसा बचत गर्न र कमाउन सिकाउने उद्देश्यले उक्त कार्यक्रम गरेको हो । जसमा कक्षा ११ र १२ का विद्यार्थी, शिक्षक, विद्यालय व्यवस्थापन समिति पदाधिकारी, सहकारीका सञ्चालक समिति पदाधिकारी र सदस्य र पत्रकार लगायतले भाग लिएका थिए ।

वित्तीय साक्षरता सबैका लागि महत्वपूर्ण रहेकोले उक्त कार्यक्रम गरिएकोको सहकारी अध्यक्ष प्रकाश पौडेलले बताए । कार्यक्रमको सहजीकरण गर्दै उनले वित्तीय साक्षरताबिना कुनै पनि समाजको समृद्धि सम्भाव नहुने हँुदा विद्यार्थी जीवनमै यसबारे ज्ञान हुने हो अझ धेरै राम्रो हुने बताए । ‘हामीले हिजोआज राम्रै आम्दानी गर्ने युवा देखेका छौं । तर उनीहरुले बचत गरेको पाउँदैनौं,’ उनले भने, ‘भविष्यमा आर्थिक संकटका बेलामा मात्रै यसको महसुस गर्छौं ।’

सहकारी कोषाध्यक्ष मिठु लम्सालले २०७७ सालमा स्थापित सहकारीले वित्तीय साक्षरता अलावा छरिएर रहेका पुँजी एकत्रित गरी किसानलाई सहुलियत दरमा कर्जा लगानी, बिउबिजन, मल उपलब्ध गराउँदै आएको बताइन् । सहकारीमा करिब ९ सय ४० सदस्य आबद्ध छन् । हाल वडा १, २ र ३ मा संस्थाको कार्यक्षेत्र छ ।