पोखरा । त्रिभुवन आर्मी क्लब र वागमती प्रदेश केपी ओली कप टी–२० राष्ट्रिय क्रिकेट प्रतियोगितामा सेमिफाइनल खेल्ने भएका छन् । यस्तै, अर्को सेमीमा विभागीय एपिएफ क्लब र मधेश प्रदेशबीच फाइनल प्रवेशका प्रतिस्पर्धा हुनेछ ।

मंगलबारको खेलमा जित हात पारेको विभागीय आर्मी समूह ‘डि’ को शीर्ष टोली हो । उसले ४ अंक बटुलेको छ । यस्तै, समूह ‘ए’ को शीर्ष टोली बागमतीले समान ४ अंक बटुल्दै आमीसँग बिहीबार पहिलो सेमिफाइनल खेल्नेछ ।

मदन भण्डारी स्पोर्टस् एकेडेमीको आयोजनामा जारी प्रतियोगितामा मंगलबारको खेलसँगै सेमिफाइनल समीकरण पूरा भएको हो । मंगलबार आर्मी र कोशी प्रदेशबीचको खेलमा आर्मीका भीम सार्की र सन्तोष कार्कीले अर्धशतकीय पारि खेल्दा कोशी ३९ रनले पराजित भयो । टस जितेर पहिल ब्याटिङ गरेको आर्मीले निर्धारित २० ओभरमा ७ विकेट गुमाउँदै १ सय ८६ रन बनायो । ओपनर सन्तोष कार्की र भीम सार्कीले अर्धसतकीय पारि खेले । सन्तोषले ४१ बलमा ५० रन बनाएर रिटायर्ड हर्ट हुँदै पेभिलियन फर्किंदा भीमले २४ बलमा ५३ रन बनाए । आर्मीका कप्तान विनोद भण्डारीले १७ र रोहित पौडेलले २३ रनको योगदान दिए ।

कोशीका सर्वण यादवले सर्वाधिक ३ विकेट लिन सफल भए । उनले ४ ओभरमा ३२ रन खर्चेर ३ विकेट लिएका हुन् । कमल खत्रीले २, प्रकाश कार्की र सोनु मण्डलले समान १–१ विकेट हात पारे ।

जवाफी ब्याटिङ गरेको कोशी १८ दशमलब २ ओभरमा १ सय ४७ रनमा समेटियो । सोनु अन्सरीले सर्वाधिक ४४ रन बनाउँदा समीर कार्की ३४, सुजन थपलिया २१ र मनीष थापाले १६ रन जोडे ।

बलिङतर्फ आर्मीका सोमपाल कामी र विवेक यादवले समान २–२ विकेट लिए । बसिर अहमद, जितेन्द्र मुखिया, शाहव आलम र रोहित पौडेलले १–१ विकेट लिन सफल भए ।

मंगलबारको अर्को खेलमा सुदूरपश्चिमले ४ विकेटले नेपाल पुलिसलाई हरायो । १५९ रनको लक्ष्य सुदूरले १८ दशमलब ४ ओभरमा ६ विकेटको क्षतिमा पूरा गरेको हो ।

विजयी सुदूरसँगै पुलिस क्लब प्रतियोगिताबाट बाहिँदा रनरेट आधारमा मधेश प्रदेशलाई फाइदा पुगेको छ । समूह ‘सि’ का ३ वटै टिमको बराबर अंक थियो ।

सुदूरका लागि प्लेयर अफ दि म्याच किरण ठगुन्नाले अविजित अर्धशतकीय पारी खेले । ३४ बलको सामना गरेका उनी नटआउट रहँदै ५१ रन बनाए । किरण र नरेन साउदले उत्कृष्ट पारी खेल्दै ९३ रनको साझेदारी गरेका थिए । नरेनले ३९ बनाए । सुदूरका लागि नारायण जोशीले ७ बलमा १७ रन प्रहार गरी विभागीय टोलीविरुद्ध जित सुनिश्चित गरे । पुलिसका लागि राशिद खानले ३ विकेट लिए भने सुनिल धमला र सागर ढकालले समान १–१ विकेट हात पारे ।

टस जितेर पारीको सुरुवात गरेका पुलिसका लागि ओपनर कुशल भूर्तेलले ५१ बलको सामना गर्दै ६७ रन बनाए । अर्का ओपनर सुनिल धमलाले ४० बलमा ४२ रन जोडे ।

बुधबार एकमात्र खेल हुने आयोजक मदन भण्डारी स्पोर्टस्ले जनाएको छ । जसमा आयोजकको नीलो र कोशी प्रदेशबीच हुनेछ ।