पोखरा । पोखरा–५, जनहितमार्गस्थित धारापानी महिला बहुउद्देश्यीय सहकारी संस्था लि.को शनिबार पाँचौं वार्षिक साधारणसभा भएको छ ।

सभा उद्घाटन गर्दै वडाध्यक्ष विष्णुप्रसाद बरालले सहकारीमा सहकार्यको मर्म हुनुपर्ने भन्दै धारापानी सहकारीले स्थापनादेखि नै रचनात्मक क्रियाकलाप गर्दै आएको चर्चा गरे । उनले सहकारी माध्यमबाट मन्टेसरी सञ्चालन गरिएकोमा सो कार्यको प्रशंसा गरे ।

वडा सदस्य कल्पना क्षत्रीले सहकारीमार्फत आर्थिक समृद्धिमा दिदीबहिनीहरु होमिएकोमा खुसी व्यक्त गर्दै धारापानी क्षेत्रका सबै महिलालाई सहकारीमा समेट्ने आग्रह गरिन् ।

त्यस अवसरमा वडा सदस्य गोविन्द पराजुली, सहकारीद्वारा सञ्चालित मन्टेसरीका सल्लाहकारद्वय हरिश्चन्द्र अधिकारी र सुरज पौडेल, सेयर सदस्य संगीता लामिछाने अधिकारी लगायतले पनि बोलेका थिए ।

सो अवसरमा असल शिक्षक रुपमा शकुन्तला त्रिपाठी, असल ऋणीका रुपमा मीरा लिगल, बालबचततर्फ सायना परियार, उत्कृष्ट बचतकर्ता गंगा सुवेदी तिमिल्सिना तथा सेयर सदस्यका ज्येष्ठ आमाबुवातर्फबाट कृष्णमाया अधिकारी र धनबहादुर गुरुङलाई सम्मान गरियो ।

सहकारी अध्यक्ष चन्द्रावती गैहे्रले अध्यक्षको, सचिव गीतादेवी पौडेलले वार्षिक प्रगति प्रतिवेदन, कोषाध्यक्ष सुजता सापकोटाले आर्थिक प्रतिवेदन, लेखा समिति संयोजक इन्दु सुवेदीले लेखा प्रतिवेदन तथा मन्टेश्वरीतर्फबाट प्रअ मीना सुवेदीले शैक्षिक प्रतिवेदन प्रस्तुत गरेकोमा छलफलसहित अनुमोदन भयो ।

कार्यक्रममा एलकेजी तथा युकेजीका विद्यार्थीले विभिन्न प्रस्तुति राखे ।

सहकारी अध्यक्ष चन्द्रावती गैहे्रको अध्यक्षतामा भएको कार्यक्रममा उपाध्यक्ष शारदा गिरीले स्वागत, सहसचिव इन्दिरादेवी शर्मा आचार्यले ७ सिद्धान्त वाचन तथा सञ्चालन सचिव पौडेलले गरेका थिए ।