पोखरा । आरुखर्क पोखरा दिदीबहिनी समूह पोखराले तीजका अवसरमा शुभकामना आदानप्रदान तथा सम्मान कार्यक्रम गरेको छ ।

गण्डकी प्रदेशका ऊर्जा जलस्रोत तथा खानेपानी मन्त्री सरस्वती अर्याल तिवारीले कार्यक्रम उद्घाटन गर्दै तीज पर्वलाई व्रत, उपवास, उपासना, आरधानाको माध्यमबाट नारी जातिको अस्तित्वलाई शिखरमा लैजाने उल्लेख गरिन् । उनले नारीहरूको चेतनास्तर बढाउन पुस्तक अध्ययन गर्ने बानीको विकास गर्नुपर्ने आवश्यकता औंल्याइन् ।

कार्यक्रमबीच साबिक आरुखर्क गाविसमा जन्म भई पोखरामा बसोबास गर्ने विभिन्न विधामा उत्कृष्टता हासिल गरेका व्यक्तित्व तथा ८० वर्ष पूरा गरेका ज्येष्ठ दिदीहरूलाई सम्मानपत्र, फूलमाला र दोसल्लाले सम्मान गरिएको छ ।

संस्थाका अध्यक्ष सावित्री शर्माको अध्यक्षतामा भएको कार्यक्रममा फेदीखोला गाउँपालिका ४ का अध्यक्ष ख्यामनारायण पौडेल, पोखरा ४ का अध्यक्ष देवकृष्ण पराजुली, सल्लाहकार मायाकुमारी गुरुङ, जनआदर्श मावि आरुखर्कका अध्यक्ष नारायणप्रसाद पौडेल, स्याङ्जा आरुखर्क पोखरा सम्पर्क समाजका अध्यक्ष यामप्रसाद पौडेल, समाजका संस्थापक अध्यक्ष टीकाराम पौडेल, मानव मिलन संस्था पोखराका अध्यक्ष गुप्तप्रसाद शर्मा लगायतले बोलेका थिए ।

कार्यक्रममा संस्थाका प्रथम उपाध्यक्ष शान्ति केसीले स्वागत, द्वितीय उपाध्यक्ष गीता पौडेलले धन्यवाद ज्ञापन र सचिव पार्वती पौडेल रेग्मीले सञ्चालन गरेका थिए ।