पोखरा । सांघाइ कर्पोरेसन अर्गनाइजेसनले बर्सेनि सदस्य राष्ट्रका सहरलाई पर्यटकीय राजधानी घोषणा गर्छ । गत वर्ष काजकिस्तानको अमाती सहर पर्यटकीय राजधानी घोषणा गरिएकोमा अघिल्लो वर्ष भारतको बनारस प्रथम सांस्कृतिक तथा पर्यटकीय राजधानी घोषित भयो । फ्रान्सको राजधानी पेरिस ‘सिटी अफ लाइट्स्’, अमेरिकाको न्यूयोर्क ‘दी बिग एप्पल’, मलेसियालाई ‘ट्रुली एसिया’ र भारत ‘इन्क्रिडिवल इन्डिया’ घोषणा गरेर ब्रान्डिङका प्रयास नभएका होइनन् ।
नेपालकै प्रमुख पर्यटकीय नगरी पोखरा पनि आइतबार ‘पर्यटकीय राजधानी’ घोषणा हुँदैछ । पोखरा महानगरपालिका र गण्डकी प्रदेश सरकारको संयुक्त आयोजनामा फेवाताल किनार वाराहीघाटमा हुने समारोहमा प्रधानमन्त्री पुष्पकमल दाहाल ‘प्रचण्ड’ ले उक्त घोषणा गर्नेछन् । प्राकृतिक, सांस्कृतिक, धार्मिक लगायत सम्पदाले भरिपूर्ण पर्यटकीय नगरी पोखरा गण्डकी प्रदेशको पनि राजधानी सहर हो । यहाँ अन्तर्राष्ट्रियस्तर तथा राष्ट्रियस्तरका अनुपम विशेषताहरु छन् ।
घोषणापछि प्रदेश सरकार र महानगरको नीति, योजना र कार्यक्रममा पर्यटन क्षेत्रले प्राथमिकता पाउने, पोखराको ब्रान्ड हुने, पर्यटन क्षेत्रमा उत्साह थपिने, पोखरामा बाह्य तथा आन्तरिक लगानी बढ्ने अपेक्षा छ । योसँगै यहाँको पर्यटन प्रवद्र्धनमार्फत जनताको जीवनस्तरमा गुणात्मक परिवर्तन, रोजगारी सिर्जना, गरिबी निवारणसहित समग्र गण्डकी प्रदेशसँगै राष्ट्रकै समृद्धि हुने अपेक्षा पनि छ ।
पर्यटकीय राजधानी घोषणाले मूर्तरुप लिँदा प्रदेश राजधानी पोखराका पर्यटन व्यवसायी उत्साहित छन् । उनीहरु के भन्छन् त ?
२० लाख पर्यटक भित्राउने लक्ष्य राख्नुपर्छ
पोमनारायण श्रेष्ठ
अध्यक्ष, पोखरा पर्यटन परिषद्
हामीहरुको धेरै पहिलेदेखिको माग हो । अहिले आधिकारिकरुपमा घोषणाको तयारी हुँदा ऊर्जा मिलेको छ । हामीहरु उत्साहित छौं । नेपालकै प्रमुख पर्यटकीय नगरी पोखरालाई अब ‘पर्यटनको राजधानी’ घोषणाले अन्तर्राष्ट्रिय रुपमा ट्रान्जिट रुपमा ब्रान्डिङ हुनेमा अवसर प्रदान गर्नेछ । यसका साथै अबदेखि केन्द्र, प्रदेश, स्थानीय सरकार सबै तिनै तहका सरकारले आ–आफ्नो कार्यक्रममा पोखरा क्षेत्रमा धेरैभन्दा धेरै पर्यटक कसरी भित्राउन सकिन्छ भन्ने योजनाका साथ बजेट विनियोजन गर्नुपर्छ । यसमा हामी पर्यटन व्यवसायीहरु पनि सरकारसँग हातेमालो गर्दै अघि बढ्ने छौं ।
पर्यटकीय राजधानी घोषणाले पोखरा फेरि घुम्न जानुपर्छ भन्ने भावना यहाँ आइसकेकालाई पनि फेरि विकास गर्नेछ । पर्यटन प्रवद्र्धन र विकासमा अन्तर्राष्ट्रियरुपमा प्रचार गर्नेछ । नेपालमा बर्सेनि १०÷११ लाख पर्यटक भित्रिने गरेको तथ्यांक छ, अब हामीहरु गण्डकी प्रदेश क्षेत्रमै २० लाख पर्यटक भित्राउने लक्ष्यका साथ अघि बढ्नुपर्छ । पर्यटकको बसाइँ कसरी लम्ब्याउने भन्नेमा हाम्रो पनि ध्यान केन्द्रित हुनेछ । पोखरा घुम्ने पर्यटक सरदर २÷३ दिन बस्ने गरेकोमा अब ४÷५ दिनसम्म यतै रमाउन सक्ने वातावरण बन्नेछ । यो घोषणासँगै पोखरा अन्तर्राष्ट्रिय विमानस्थलबाट अन्तर्राष्ट्रिय उडान होस् वा निर्माणाधीन बाटोघाटो लगायत समयमै सम्पन्न गर्न दबाब हुनेछ । भएका पर्यटकीय गन्तव्य संरक्षण गर्दै नयाँ नयाँ गन्तव्य पहिल्याउनु पर्दछ । पोखरा घुम्ने आउने पर्यटकको अभिलेख राखिनुपर्दछ ।
पोखरा आसपासको पर्यटनमा ७ खर्ब लगानी रहेको अनुमान छ । पोखरामै करिब ६ खर्बको लगानी छ । यो लगानी सुरक्षित गर्दै अझै पर्यटन क्षेत्रमा थप लगानी भित्राउन लाग्नुपर्छ । समग्र पर्यटनको क्षेत्रमा लगानी पनि अवश्यक थपिने विश्वास छ । त्यसो त यहाँ चेन होटलहरुले पनि चासो देखाइरहेका छन् । पोखरा अब साँच्चिकै पर्यटकको राजधानी सही सावित हुनेछ । आगामी दिनमा हामीहरु सबै जना कम्मर कसेर अघि बढ्नुपर्छ ।
समग्र गण्डकी प्रदेशकै पर्यटनमा टेवा मिल्ने
हरि शर्मा गैरे
अध्यक्ष, होटल संघ नेपाल गण्डकी प्रदेश
यो सकारात्मक कदम हो । नेपालकै सन्दर्भमा पोखरा पर्यटकीय राजधानीको रुपमा परिचित छ । राजधानीको रुपमा जुन ब्रान्डिङ गर्न खोजिएको छ, त्यो एकदमै सकारात्मक कदम हो । यसको लागि हाम्रो क्षेत्र सधैँ तयार छ ।
पोखरा आसपासमा जति पर्यटकीय पूर्वाधार निर्माण हुनुपर्ने हो, त्यो नभएको जस्तो पाइन्छ । पर्यटनको राजधानी घोषणा पनि एक माध्यम हो, यसले भौतिक पूर्वाधार निर्माणमा ढोका खोल्ने विश्वास छ । समग्र गण्डकी प्रदेशवासीले यसलाई अपनत्व लिएर अघि बढेमा सबैलाई हित हुनेछ । पोखरा प्रादेशिक राजधानी त हो नै तर मोफसलको प्रवद्र्धन नभइकन पोखराको प्रवद्र्धन हुँदैन । नेपालमा भित्रिसकेको पर्यटकलाई पोखरा कसरी भित्राउने हो भन्ने सोच्नुपर्छ । यहाँ आइसकेपछि यस आसपासका पर्यटकीय क्षेत्र घुमाउन ‘लेन्थ अफ स्टे’ अति आवश्यक छ । पोखरा पर्यटनको राजधानी घोषणाले आसपासका जिल्लासहित समग्र गण्डकी प्रदेश एवं नेपालकै पर्यटनमा टेवा मिल्नेछ ।
पोखराको लक्जरियस अकोमोडेसन (आरामदायी बसाइँ) को आर्थिक रुपमा मन्दी भइरहेको बेलामा पोखराले एउटा जमर्को गरेको छ, यसले एक सोचको विकासमा बल प्रदान गरेको छ । एउटा फाइभ स्टार होटल (पोखरा ग्रान्ड) हुँदाहुँदै पनि अरु फाइभ स्टार एवं सुविधासम्पन्न होटल खुल्दै जाने छन् । यहाँको विमानस्थल, गेट–वे मर्मत सम्भार स्तरोन्नतिसँगै हाल करिब ५० प्रतिशतको अराइललाई ८० प्रतिशतसम्म पु¥याउनुपर्छ । त्यो मिट गर्न पनि यो घोषणा कोसेढुंगा सावित हुन सक्छ । हामीसँग गण्डकीका ११ जिल्लाका गरी करिब १५ सय होटल संघमा आवद्ध छन् । त्यसमा फोर, फाइभ स्टारदेखि पर्यटकीयस्तरका होटलहरु (जसले नेपाल सरकारलाई कर तिर्छन्) तिनीहरुले मात्रै हाम्रो सदस्यता प्राप्त गर्छन् । समग्र रुपमा पर्यटन क्षेत्रमा सबैभन्दा बढी लगानीको हिस्सा होटलकै छ । हामीहरु के के विषयमा आत्मनिर्भर छौं, जस्तो अन्नमा छौं कि मासुमा छौं कि वा अन्य के कुरामा आत्मनिर्भर छौं ? भन्ने कुरा पर्यटकलाई देखाउन सक्नुपथ्र्यो, त्यसतर्पm हाम्रो निकायले गर्न सकिरहेको अवस्था छैन । त्यसबारे अब छलफलको विषयको बन्ला ।
कुनै निश्चित घेरामा सीमित नहोस्
कमला गिरी
अध्यक्ष, पर्यटन व्यवसायी महिला संघ नेपाल (टेवान)
पोखरालाई पर्यटकीय राजधानीरूपमा घोषणा गर्नेसम्बन्धी कसले पनि जस लिनेभन्दा व्यावहारिक पक्ष बलियो र निःस्वार्थ हुन जरूरी छ । पर्यटकीय राजधानीको आवश्यकता र औचित्य पनि के, कसरी र किन छ भन्ने पनि विषय सार्वजनिक हुनु पर्दछ । यसका लागि हाम्रा पूर्वाधार कति तयार छन् ? यो गन्तव्यमा पर्यटक कुन आकर्षणले आउने हुन् ? सरकारी तथा निजी क्षेत्रले कस्ता सुविधाहरू प्रदान गर्ने हुन् ? यहाँ पर्यटक नआई नहुने वातावरण केले बनाउन खोज्या हो, हाम्रा प्रोडक्ट कति आकर्षक छन् ? खाने, बस्ने, बस्ने, रमाउने, घुम्ने स्थानले सबै तह र तप्काका पर्यटकलाई आकर्षण गराउन सकिने छ कि छैन ? यावत् विषयमा पनि पहिला सोच्नुपर्दछ ।
पोखरामा पाँचतारे होटल बन्न सकिरहेको छैन । फूलबारी रिसोर्ट पनि पूर्णतया बन्द छ । कम्तीमा ३/४ वटा त्यो स्तरको होटल हुनु पर्यो । त्यही स्तरका पर्यटक ल्याउन सकिएन भने राजधानी भन्नुको औचित्य फेरि नरहला । यहाँ सुविधासम्पन्न क्यासिनो छैन । भए पनि सानातिनो अति नियन्त्रित छ । न त मनोरञ्जनका लागि रात्रीकालीन गन्तव्य छन् । न कुनै अन्तर्राष्ट्रिय सभा सम्मेलन गर्न सक्ने क्षमता छ । न कुनै आर्टिफियिल नै भए पनि आकर्षक गन्तव्य छन् । न त राष्ट्रिय वा अन्तर्राष्ट्रियस्तरमा सघन रूपमा पर्यटन प्रवद्र्धनका कार्यक्रम छन्, यी सबै अत्यावश्यक हैनन् र ?
हामी केवल प्राकृतिक सौंदर्य, फेवाताल, वेगनास ताल मात्र बेचिरहेका छौं । यो पर्याप्त छैन । पोखरालाई स्वास्थ्य, शिक्षा, धार्मिक, सांस्कृतिक पर्यटनको गन्तव्यको रूपमा विकास गर्न सकिने प्रचूर सम्भावना हँुदाहुँदै यसतर्फ कुनै ठोस पहल भैराखेको पाइँदैन । अब राजधानी घोषणासँगै त्यसमा ध्यान दिनुपर्दछ ।
विविध सम्भावनाको खोजी गर्दै पोखरालाई आकर्षक गन्तव्यरूपमा विकास र प्रवद्र्धन गर्दै जान सकियो भने यसबाट समग्र गण्डकी प्रदेशको सबै जिल्लाहरू र सबै क्षेत्रले अनुभूति गर्न सक्ने छन् । यहाँ लगानीमैत्री वातावरण बनोस् । उद्योगी व्यवसायी, नागरिकले सहजरूपमा सास फेर्न पनि गाह्रो भएको अवस्था छ, अहिले । त्यसैले जे गरिँदैछ, त्यो सबै नागरिकको हितमा होस् । कुनै निश्चित घेरामा सीमित नहोस् । घोषणा गर्नु आफँैमा राम्रो कुरा हो तथापि पोखरा प्रवद्र्धनको हिसाबले हुन लागेको यो प्रयास पनि प्रशंसीय नै छ । सकारात्मक प्रभाव अवश्य पर्नेछ ।
होटल क्षेत्रमा २० प्रतिशत छुट घोषणा
लक्ष्मण सुवेदी
अध्यक्ष, होटल संघ पोखरा
चैत ४ गते पोखरालाई ‘पर्यटनको राजधानी’ घोषणा गर्ने तयारीसँगै हामीहरु निकै उत्साहित छौं । १५ वर्ष अघिदेखि होटल संघले राख्दै आएको माग हो, यो । घोषणाका लागि यहाँको संरचना, पूर्वाधार, आवश्यक सेवासुविधा, राजधानी हुनका लागि होटल, ट्राभल, टे«किङ, क्यासिनो, नाइट लाइभ, एयरपोर्ट लगायत सबै सुविधा चाहिन्छ ।
ती यावत् सबै रहेकोले त्यसबेलादेखि नै हाम्रो माग रहीआएकोमा अहिले आएर पोखरा महानगरपालिका र गण्डकी प्रदेश सरकारको जुन पहलकदमी छ, त्यो निकै सह्रानीय छ । हामीहरु दिलदेखि नै स्वागत गरेका छौं । हामीहरुले यही अवसरमा छुटको घोषणा गरेका छौं । राजधानी घोषणको खुसीयालीसँगै नजिकिएको फेवा नव वर्ष महोत्सव–२०८१ प्रवद्र्धन गर्ने उद्देश्यले विभिन्न प्याकेजसहित २० प्रतिशत छुटको घोषणा गरेका छौं ।
यो सुविधा नेपाली नयाँ वर्षसम्म लागु हुनेछ । होटल संघ पोखरा नेपालले आगामी चैत २९, ३० र वैशाख १ गते १९ औं फेवा नव वर्ष महोत्सव आयोजना गर्दैछ । यो सुविधा संघमा आबद्ध सदस्य होटलहरुमा लागु गर्न सर्कुलर जारी गरिसकेका छौं । हाल संघमा ४ सय २५ सदस्य छन् । पोखरा र आसपासमा १ हजार २ सय होटल छन् । लेकसाइड र ड्यामसाइडमा ७ सय होटल छन् ।
पोखराका होटलमा ४० हजार बेड छन् । होटल क्षेत्रमा मात्र १५ हजार कर्मचारी कार्यरत छन् । पर्यटन क्षेत्रमा सबैभन्दा ठूलो हिस्साको लगानी होटलमा हो । करिब पौने ५ खर्बको लगानी त हाम्रो मात्रै छ । केही पनि भएन भन्नुभन्दा, पोखरा पर्यटनको राजधानी घोषणा भइसकेपछि त अझ पर्यटन प्रवद्र्धन र लगानी बढ्ला हाम्रो अपेक्षा छ ।
फेवाताल जोगाउनु पर्छ
–युवराज बराल
पर्यटन व्यवसायी ।
पर्यटकीय राजधानी घोषणा गर्दैमा खासै केही हुने होइन । भौतिक पूर्वाधार निर्माण तथा ताल संरक्षणमा जति ध्यान दिनुपर्ने हो, त्यसतर्फ ध्यान नदिई खालि घोषणा गर्दैमा हुने केही होइन ।
काठमाडौंमा अदालतको आदेशले मेयर बालेनले काम गर्न पाएका छैनन् । तर, यहाँका (पोखराका) मेयरले के कारणले रोकिएका हुन् ? जबकि सर्वोच्चले फेवातालको मापदण्डभित्र पर्ने संरचना हटाउन ६ महिनाको म्याद दिएको हो । खासै काम हुन सकेको छैन । कम्तीमा तालमा नमिसाउने गरी ढल काटेर फाल्ने गरे पनि धेरै हदसम्म राम्रो हुन्थ्यो । पहिले हामीले फेवाको पानी खाएकै हो । स्वीमिङ गर्दा मुखमा पानी परे पनि केही हुँदैनथ्यो । अहिले त्यहाँको पानी छोइए, घरमा आएर हातखुट्टा धुनुपर्ने बाध्यता हुन्छ । नुहाउनु पर्छ ।
म ड्यामसाइडमा न्यू होटल नेचरल्यान्ड चलाउँछु । पहिला यही ड्यामसाइड पर्यटनको केन्द्र थियो । यहाँबाट नै हो, माछापुच्छ«ेको सबैभन्दा सुन्दर छाया देखिने । अहिले यसतर्फ ध्यानै दिइएको छैन । साना साना यस्तै कुराहरुमा ध्यान पु¥याउनुपर्नेमा घोषणाले मात्र केही हुँदैन । होटलहरु पनि अनावश्यक धेरै भए । पोखराको लेकसाइड छेउमा मात्रै होटल थुप्रिने प्रवृत्ति भयो । छेउछाउका रिसोर्ट, होमस्टेसम्म पनि पर्यटक पुग्नुपर्छ । पर्यटकीय राजधानीमा अस्वस्थ प्रतिस्पर्धा हुनुहुँदैन । नियमन हुनुपर्छ ।
चोकचोकमा भाडाका मान्छे खटाएर पोखरा घुम्न आउने गेस्टहरुलाई जबर्जस्ती तान्ने काम रोकिनुपर्छ । सुरक्षा निकायले नियन्त्रण गर्नुपर्छ । होटलमा आइसकेपछि अनावश्यक बार्गेनिङ प्रवृत्ति हुनुहुँदैन । होटलको फेसिलिटी अनुसार रेट छुट्याउनुपर्छ । पोखरामा प्राकृतिक रुपमा पर्यटकीय गन्तव्य धेरै भए पनि मानवनिर्मित संरचना खासै छैनन् । पछिल्लो समय पुम्दीकोटमा बनेको विशाल महादेवको मूर्ति अवलोकनका लागि हामीहरु गेस्टलाई पठाइन्छ । यस्तै अरुहरु पनि बन्नुपर्छ । यस विषयमा तिनै तहका सरकारले सहजीकरण गर्नुपर्छ ।
Related News
सम्बन्धित समाचार
पोखराका स्पामा बालिकालाई लगाइन्छ यौनजन्य कार्यमा, ६ जनाको उद्धार
बलात्कार मुद्दामा सन्दीप लामिछानेले पाए सफाइ
पोखरामा फोहोरबाट रोजगारी सिर्जनाका लागि कोरियाको ९८ लाख अमेरिकी डलर सहयोग
व्यास नगरपालिकामा मेयर चुनावको पुन मतगणना गर्न आदेश
पोखरामा बुद्ध जयन्तीको सप्ताहव्यापी कार्यक्रम
hero news full width
मुख्य समाचार
जिबी राईको राहदानी रद्द भएन
पोखराको प्राइम सहकारी पनि समस्याग्रस्त, डेढ अर्ब हिनामिना
जेठ १, २०८१सरकारको आगामी आर्थिक वर्ष २०८०/८१ को नीति तथा कार्यक्रम (पूर्णपाठ)
जेठ १, २०८१राष्ट्रपतिबाट सरकारको नीति तथा कार्यक्रम प्रस्तुत
जेठ १, २०८१लोकतान्त्रिक आन्दोलनका जिउँदा सहिद खगेन्द्र सर
जेठ १, २०८१वर्ष दिन नपुग्दै सरुवा भए गण्डकीका अर्थसचिव रिज्याल, पुरुषोत्तम शर्मा आउने
जेठ १, २०८१