पोखरा । नेपालले युएईलाई शुक्रबार ६ विकेटले हराएर घरेलु मैदानमा पहिलो एक दिवसीय अन्तर्राष्ट्रिय (ओडीआई) शृंखला जितेको छ ।

नेपालले घरेलु मैदानमा २ ओटा ओडीआई शृंखला खेल्दा यो पहिलो शृंखला जीत हो । गत चैतमा कीर्तिपुरस्थित त्रिवि मैदानमा भएको पपुवा न्युगिनीविरुद्धको शृंखलाा भने नेपाल २–० ले पराजित भएको थियो ।

नेपालले ओडिआईको पहिलो शृंखला पनि युएईविरुद्ध नै जितेको थियो । सन् २०१९ मा युएईमा भएको शृंखला नेपालले २–१ ले जितेको थियो ।

गत वर्ष ओमानमा भएको पपुवा न्युगिनीविरुद्ध २ खेलको ओडीआई शृंखला नेपालले २–० ले जितेको थियो । नेपालले शृंखलामा पहिलो खेल गुमाए पनि त्यसपछि लगातार २ खेल जितेर पुनरागमन गर्दै सिरिज जितेको हो ।

पहिलो खेफमा ८४ रनले पराजित भएको नेपालले दोस्रो खेल ३ विकेटले जितेको थियो ।

तेस्रो खेलमा आसिफ शेख र ज्ञानेन्द्र मल्लले शतकीय साझेदारी गर्दै नेपाललाई सहज जित दिलाए । आसिफले अविजित रहँदै ८८ रन बनाए । ज्ञानेन्द्रले ६४ रन बनाए ।

रोहित पौडेले यसै सिरिजबाट नेपालको कप्तानी यात्रा सुरु गरेका छन् । उनको पहिलो कप्तानी सिरिज नै नेपालले जितेको छ ।