पोखरा । श्रीकृष्णाष्टमी पर्वको अवसरमा विश्व हिन्दु महासंघले पोखरामा बुधबार शोभायात्रा निकाल्यो । शोभायात्रामा झाँकी, भजन, नृत्यसहित विभिन्न धार्मिक संघसंस्थाको सहभागिता थियो ।

पोखरा–१७ ड्यामसाइडस्थित राधाकृष्ण मन्दिरमा बिहानै पूजा अर्चना गर्नेहरूको भीड लागेको थियो । मन्दिरमा पण्डित दीपक सापकोटाले संगीतमय कथा प्रवचन प्रस्तुत गरेका थिए । मन्दिरले कार्यक्रमको प्रचार गर्ने हेतुले मंगलबार नै शोभायात्रा यात्रा गरेको थियो ।

पोखरा भजन चुट्का संरक्षण प्रतिष्ठानबाट पोखरा सभागृहमा बालन नाच प्रदर्शन भयो । लोपोन्मुख श्रीकृष्ण लीला (बालन नाच) को संरक्षण गर्ने उद्देश्यले उक्त प्रदर्शनको आयोजना गरिएको स्रष्टा खगराज शर्मा आचार्यले जानकारी दिए ।