पोखरा । हाइकर्स क्लब नेपालको आयोजनामा आयोजित हाइकिङ भाग ४६ को अवसरमा कालाबाङ घरेडी सामुदायिक होमस्टेको प्रवद्र्धन गरेको छ ।

स्वास्थ र पर्यटनको लागि हाइकिङ नाराका साथ हरेक महिनाको अन्तिम शनिबार हाइकिङ कार्यक्रम गर्दै आएको क्लबका सदस्य र पदयात्राप्रेमी वैशाखको अन्तिम शनिबार कालाबाङ घरेडी सामुदायिक होमस्टेमा पुगेको क्लबका अध्यक्ष कृष्ण रानाभाटले बताए ।

हाइकिङमा सहभागीलाई स्वागत गर्दै होमस्टे अध्यक्ष यामबहादुर गुरुङले होमस्टेले गाउँ मुहार फेरिएको, गाउँ फर्केर पर्यटन र कृषिमा लाग्नेको संख्या बढ्दै गएको बताउँदै खानेपानी व्यवस्थापनमा सम्बन्धित निकाएको बेलैमा ध्यान जानुपर्ने बताए ।

हाइकिङमा विद्यार्थी, कर्मचारी, व्यवसायी, पत्रकार सहभागी थिए । उनीहरूले कालाबाङ घरेडीको शिरमा निर्माणाधीन बुद्ध पार्क, होमस्टे सञ्चालन रहेका घरहरू, गुम्बा, सामुदायिक समाज घर, स्थानीय खेतीपातीको अवलोकन गर्दै पुम्दीकोट, शान्ति स्तूप, रानीवन हुँदै ड्यामसाइडसम्म २० किमी पैदल हिँडेका क्लबका उपाध्यक्ष ज्योति हमालले बताइन् ।

क्लबले आजीवन र साधारण सदस्य बनाउने गरेको छ भने स्थानीय निकायहरूसँग सहकार्य गर्ने योजना रहेको कोषाध्यक्ष टीका आचार्य सुबेदीले बताइन् । उनले हाल ७० जना क्लबमा आबद्ध भएको पनि जानकारी दिएकी छन् ।

ट्रेकिङ गाइड तथा क्लबका कार्यसमिति सदस्य सुन्दर त्रिपाठीले पैदल यात्राका क्रममा ध्यान दिनुपर्ने कुरा बताएका थिए भने अर्का सदस्य तिलक थापाले क्लबले आयोजना गर्ने कार्यक्रममा नियमित सहभागी हुन आग्रह गरे ।