पोखरा । नागरिक अधिकार र समृद्धिका लागि भन्दै मुलुकमा धेरैथरि राजनीतिक परिवर्तन भए । २ सय ३८ वर्षको राजतन्त्र फालेर गणतन्त्र आयो । मुलुकमा संघीयता पनि कार्यान्वयन भयो । ३ तहका सरकारले काम गर्न थालेपछि गाउँगाउँमा सिंहदरबारको नाराले राम्रैसँग बजार पनि पिट्यो । प्रदेश तथा स्थानीय तहले पहिलो ५ वर्षे कार्यकाल पूरा गरेर दोस्रो कार्यकालको अभ्यास गरिरहेका छन् । बितेको ५ वर्षे अवधिको मूल्यांकन गर्दा प्रदेश संरचनाका बारेमा अलि बढी नै आलोचना हुने गरेको छ । त्यसो त कार्यशैली हेर्ने हो भने स्थानीय तहले पनि सोचेजस्तो गर्न सकेका छैनन् ।
संघीयता घाँडो भयो, महँगो भयो, प्रदेश संरचना सेतो हात्ती हो भन्ने आवाजहरु अहिले बग्रेल्ती उठेका छन् । के नेपालमा संघीयता आवश्यक नै छैन त कि यसको मोडालिटी फेर्नु पर्ने हो वा खर्च प्रणाली मितव्ययी बनाउनु पर्ने हो ? यी विषयबारे चोकचोकमा चर्चा हुन्छन् । जुन कुरा दल र सत्ता सञ्चालकले बुझ्न जरुरी छ । यस विषयमा पृथ्वीनारायण क्याम्पस पोखराले बुधबार परिचर्चात्मक कार्यक्रम गरेको छ । ‘नेपाली लोकतन्त्रको बहस ः अवसर र चुनौती’ विषयक कार्यक्रममा फेडरिक इबर्ट स्टिफुङले सहयोग गरेको हो ।
कार्यक्रममा सहभागीहरु मुलुका संघीयताको विकल्प नभएको बताइरहँदा दल, सत्ता सञ्चालक, कर्मचारीतन्त्रको कार्यशैलीमाथि बग्रेल्ती प्रश्न उठाए । राजनीतिक परिवर्तनका लागि एकजुट हुने दलहरु परिवर्तनलाई संस्थागत गर्न नसक्दा नागरिकमा असन्तुष्टि बढिरहेको उनीहरुको भनाइ थियो ।
कार्यक्रममा वरिष्ठ अधिवक्ता सुरेन्द्र थापामगरले लोकतान्त्रिक संघीयता संघ, प्रदेश र स्थानीय तहको अन्तरसम्बन्ध, चुनौती र अवसरका बारेमा कार्यपत्र प्रस्तुत गरे । नेपालको संविधानले सहकारितालाई आत्मसात गरे पनि ३ तहका सरकारबीच समन्वय हुन नसकेको उदाहरण उनले पेस गरे । अनुसूचीमा उल्लेख गरिएको अधिकारका सूचीहरुमाथिको हस्तक्षेप, कानुन निर्माणमा प्रदेश र स्थानीय तह सक्षम हुन नसक्नु जस्ता कारणले संघीयतामाथि प्रश्न उठेको भनाइ राखे । उनले भने, ‘संविधानमा उल्लेखित ३ वटा सिद्धान्तहरु सहकारिता, सहअस्तित्व र समन्वयलाई आत्मसात गर्नु तीनै तहको सरकारको दायित्व हो । तसर्थ कसिलो अन्तरसम्बन्ध, सवल वित्तीय संघीयता, सफल प्रशासनिक संघियता, कानुन तर्जुमामा क्रियाशीलता र सेवाप्रवाहमा तदारुपता भयो भने मात्र संघीयताको अनुभूति हुन्छ ।’
पृथ्वीनारायण क्याम्पसमा प्राध्यापनरत डा. देवीलाल शर्मा तिमिल्सिनाले प्रदेश र स्थानीय तहलाई राजस्व संकलन लगायत वित्तीय अधिकार निकै कम भएको बताए । संघबाट आउने अनुदान र बाँडफाँटको रकममा मात्र निर्भर रहनु परेको भन्दै संघ, प्रदेश र स्थानीय तह कसैमा पनि आन्तरिक आम्दानीबाट सञ्चालन खर्च धान्न सक्ने अवस्था नरहेको बताए । प्रदेश र स्थानीय तहहरुले राजस्व सुधार योजनालाई प्राथमिकतामा राख्न उनको सुझाव थियो ।
राजनीतिक परिवर्तनका लागि एकजुट हुने दलहरु परिवर्तनलाई संस्थागत गर्न नसक्दा नागरिकमा असन्तुष्टि
अर्को कार्यपत्र प्रस्तुत गर्दै राजनीतिशास्त्रकी विद्यार्थी डिलकुमारी पौडेलले लोकतन्त्रलाई राष्ट्रियता, सामाजिक न्याय र विविधतायुक्त सबै समुदायको सम्मान र उनीहरुको जनजीविकामा निरन्तर सुधारसँग जोड्नु पर्ने बताइन् । लोकतन्त्रलाई जनताको आर्थिक, सामाजिक उन्नतिसँगै लैजान नसक्दा लोकतन्त्रमा बारम्बार अवरोध र यसविरुद्ध षड्यन्त्र हुने गरेको उनको भनाइ थियो । यी अवरोध तथा षड्यन्त्र कसैको महत्व र समयको गतिलाई नबुझ्ने शान्तिविरोधी तत्वहरुबाट हुने भन्दै उनले भनिन्, ‘जो इतिहासमा बिलाएर गए र जाँदै छन् । लोकतन्त्रको त्यो ऐतिहासिक गतिलाई रोक्न खोज्नु दुश्साहस थियो । लोकतन्त्रलाई अवरोध गर्न खोज्न सक्ने शक्तिलाई जनताले परास्त गरेको इतिहास हाम्रो सामु ताजै छ ।’
पृथ्वीनारायण क्याम्पसका पूर्व प्रमुख गेहेन्द्रेश्वर कोइरालाले दलहरु इमानदार नहुँदा मुलुक कमजोर बन्दै गएको बताए । आर्थिक, सामाजिक, सांस्कृतिक विकास हुनुपर्ने गति उल्टो हुने थालेको उनको भनाइ थियो । अधिवक्ता मीना रानाभाटले मुलुकमा ल्याएको व्यवस्था माटो अनुकूल हो कि होइन भनेर मनन् गर्नुपर्ने बताइन् । पत्रकार एवं अधिवक्ता मनोज घर्तीमगरले समावेशी सिद्धान्तले नेपालमा प्रतिनिधित्व बढाए पनि नेतृत्व बढाउन नसकेको भनाइ राखे । राजनीतिकशास्त्र प्राध्यापन गर्ने डा. उमानाथ बरालले लामो संघर्षले आएको संघीयता कार्यान्वयनमा सबै पक्ष इमानदार भएर लाग्नुपर्ने बताए ।
पृथ्वीनारायण क्याम्पस राजनीतिकशास्त्रका विभागीय प्रमुख प्राडा ठानबहादुर खत्रीले प्राज्ञिक क्षेत्रबाट यस्ता बहस नियमित रुपमा हुनुपर्ने भन्दै आगामी दिनमा समेत निरन्तरता दिइने बताए । उपप्राध्यापक गिरिधारि सुवेदीले शासन व्यवस्थालाई मजबुत बनाउन र राजनीतिक नेतृत्वलाई जिम्मेवार बनाउन यस्ता बहस फलदायी हुने भनाइ राखे । कार्यक्रममा प्राध्यापक, विद्यार्थी, अध्येता, अनुसन्धानकर्ता, राजनीतिकर्मी, पत्रकार, नागरिक समाजका प्रतिनिधिको सहभागिता थियो ।
Related News
सम्बन्धित समाचार
पोखरा सिँगार्न दिनहुँ श्रमदानमा खटिन्छन् सीताराम
पोखरा–१२ का सामुदायिक विद्यालयमा संस्कार शिक्षा
मुग्लिन–पोखरा सडक पूर्वी खण्डको म्याद थपियो
फेवाको मापदण्ड घटाउन सर्वोच्चमा रिट
सहकारीका विकृति राजनीतिकर्मीका लागि चुनौती : मुख्यमन्त्री अधिकारी
hero news full width
मुख्य समाचार
पर्वत र बागलुङका सिडिओ फेरिए
जनप्रिय क्याम्पस प्रमुखमा रमेशबहादुर खड्का
जेठ ४, २०८१धानको लोपोन्मुख प्रजाति संरक्षण गरिँदै
जेठ ४, २०८१गण्डकीमा थुप्रिए रुग्ण र समस्याग्रस्त योजना
जेठ ४, २०८१सराङकोटमा सहिद स्मृति भवन निर्माण
जेठ ३, २०८१पोखराका स्पामा बालिकालाई लगाइन्छ यौनजन्य कार्यमा, ६ जनाको उद्धार
जेठ २, २०८१