पोखरा । पोखराका चिरञ्जीवी पौडेल सोमबार बिहानै यती एयर दुर्घटनास्थल पुगे । उनका भाइ त्रिभुवन पौडेलको गत वर्ष १ माघमा यती एयर दुर्घटनामा ज्यान गएको थियो । दिवंगत आत्माको चिरशान्तिको कामना गर्दै श्रद्धाञ्जली दिन पुगेका चिरञ्जीवी त्यहाँ धेरै समय बस्न सकेनन्, केही मिनेटमै फर्किए ।
‘म त बस्नै सकिनँ । श्रद्धाञ्जली दिन्छु भनेर गएको थिएँ, सबै मान्छेहरू रोइरहेको देखेपछि अनेक सोच आयो,’ मलिन हुँदै उनले भने, ‘आँखाभरि आशु लिएर फर्किनेबाहेक के गर्न सकिन्छ र ? हामीलाई अझै त्यहाँ पुग्ने वातावरण नै बनेको रहेनछ । मलाई त बरु यस्ता कार्यक्रम नै नभइदिए हुन्थ्यो जस्तो लाग्छ ।’
त्रिभुवन नेपाल पत्रकार महासंघ केन्द्रीय सदस्य एवं प्रेस सेन्टरका केन्द्रीय उपाध्यक्ष थिए । पत्रकार महासंघ कास्कीमा सचिव, उपाध्यक्ष हुँदै उनी महासंघ गण्डकीको संस्थापक अध्यक्ष थिए ।
पोखराकै बुद्धि ठकुरीको मानसपटलबाट अझै आफ्नी भतिजीको याद हटेको छैन । भतिजी संगीता शाही पनि त्यही दुर्घटनामा परिन् । बिहानै बुद्धिले दुर्घटनास्थलमा पुगेर भतिजीको नाममा बत्ती बाले र आत्मशान्तिको कामना गरे । ‘कहालीलाग्दो घटना भयो । मानवीय त्रुटिले घटना भएको भन्छन् । विभिन्न बहाना बनाएर दुर्घटनाको रिपोर्ट निकालिन्छ,’ उनले भने, ‘हाम्रा आफन्त रिपोर्टले फर्किन्छन्छन् र ? यस्ता घटना क्षम्य छैनन् । सम्बन्धित निकाय गम्भीर हुनुपर्छ ।’
आफन्तले मृतकको नाममा सामूहिकरूपमा शान्तिपूजा गर्दै दिवंगत आत्माको चिरशान्तिको कामना गरे । तर कसैको पनि आँखा ओभानो थिएन । सबै भक्कानिएका देखिन्थे ।
दुर्घटनास्थलमा पोखरा महानगरपालिकाको पहलमा स्मृति स्तम्भ निर्माण गरिएको छ । उक्त स्तम्भमा ५७ नेपाली र १५ विदेशीको नाम अंकित छ ।
स्मृति स्तम्भ अनावरण गर्दै पोखराका मेयर धनराज आचार्यले सोही ठाउँमा झोलुङ्गे पुल र पार्क निर्माण गर्ने प्रतिबद्धता जनाए । उनले भने, ‘दुर्घटना उत्सव होइन । सम्झिरहँदा पनि मन पोल्छ तर स्मृति सकिँदैन । उहाँहरुको स्मृतिमा पोखरा महानगरले झोलुंगे पुल र पार्क निर्माण गर्दै छ ।’ उनले स्तम्भसहित वरपर तारबार गर्न १० लाखको बजेट विनियोजन भएको र काम गरिरहेको उनले बताए । पोखरा ७ का वडाध्यक्ष राममोहन आचार्यले पनि दिवंगत आत्माको चिरशान्तिको कामना गरे ।
स्थानीय जमुना बस्नेतलाई गत वर्षको उक्त घटनाको अझै झलझली याद आउँदो रहेछ । भनिन्, ‘साना छोराछोरी थिए, आगोको मुस्लो देख्दा के गरौं र कसो गरौं भयो । सबै जना आत्तियौं । अहिले पनि यतातिरबाट प्लेन घुम्दा डर लाग्छ । विमानस्थल नपुगुञ्जेल हेरिरहन्छौं ।’
यती एयर दुर्घटनाको १ माघमा वर्षदिन पूरा भएको छ । नेपाली आकाशमा भएको यो दुर्घटना अहिलेसम्मकै ठूलो मानवीय क्षति हो । काठमाडौंबाट पोखराका लागि उडेको यती एयरलाइन्सको ९एन एएनसी कल साइनको जहाज विमानस्थल अवतरण गर्नै लाग्दा सेती खोंचमा खसेर दुर्घटनाग्रस्त भएको थियो । उक्त दुर्घटनामा परी चालक दलका सदस्य ४ सहित ७२ जना सेती खोंचमा विलय भएका हुन् ।
नेपालको हवाई इतिहासमै एटिआर ७२–५०० सिरिजको जहाजको यो पहिलो दुर्घटना थियो । नेपाली हवाई आकाशमा आन्तरिकतर्फको सबैभन्दा ठूलो उक्त दुर्घटनाको दिएको पीडाको घाउ अझै आलै छ । उक्त दुर्घटना मानवीय त्रुटिका कारण भएको हालैमात्र जाँचबुझ आयोगले बुझाएको अन्तिम प्रतिवेदनमा औंल्याइएको छ । तर, जे–जसो भए पनि मृतकका परिवार र आफन्तका लागि कहालीलाग्दो उक्त घटनाको त्रासदी बरोबर आइरहन्छ ।
यसैबीच, पत्रकार त्रिभुवन पौडेल र अनिल शाहीको प्रथम पुण्यतिथि पारेर नेपाल पत्रकार महासंघ कास्कीमा सोमबार श्रद्धाञ्जली सभा भयो । सभामा उपस्थित सबै जनाको आँखा रसाएको थियो ।
दुर्घटनाबारे गठित दुर्घटना जाँच आयोगको प्रतिवेदन अनुसार सो दुर्घटना मानवीय त्रुटि प्रमुख कारक हो भनिएको छ । पूर्वसचिव नगेन्द्रप्रसाद घिमिरे संयोजकत्वको जाँचबुझ आयोगले गत १२ पुसमा सोको प्रतिवेदन संस्कृति, पर्यटन तथा नागरिक उड्डयनमन्त्री सुदन किरातीलाई बुझाएको थियो ।
गत वर्ष अंग्रेजी नयाँ वर्षको अवसर पारेर १७ पुसमा प्रधानमन्त्री पुष्पकमल दाहाल प्रचण्डले भव्य समारोहबीच पोखरा अन्तर्राष्ट्रिय विमानस्थल उद्घाटन गरेका थिए । उद्घाटनको दुई साता नबित्दै उक्त दुर्घटना भएको थियो ।
Related News
सम्बन्धित समाचार
उषा र प्रकाश पोखरा साइकल दौड च्याम्पियन
पोखरा सिँगार्न दिनहुँ श्रमदानमा खटिन्छन् सीताराम
पोखरा–१२ का सामुदायिक विद्यालयमा संस्कार शिक्षा
मुग्लिन–पोखरा सडक पूर्वी खण्डको म्याद थपियो
फेवाको मापदण्ड घटाउन सर्वोच्चमा रिट
hero news full width
मुख्य समाचार
सहकारीका विकृति राजनीतिकर्मीका लागि चुनौती : मुख्यमन्त्री अधिकारी
पर्वत र बागलुङका सिडिओ फेरिए
जेठ ४, २०८१जनप्रिय क्याम्पस प्रमुखमा रमेशबहादुर खड्का
जेठ ४, २०८१धानको लोपोन्मुख प्रजाति संरक्षण गरिँदै
जेठ ४, २०८१गण्डकीमा थुप्रिए रुग्ण र समस्याग्रस्त योजना
जेठ ४, २०८१सराङकोटमा सहिद स्मृति भवन निर्माण
जेठ ३, २०८१