पोखरा । आदर्श अर्गानिक कृषक समूह, पोखरा १३ आर्वाको नवांै वार्षिक साधारण सभा शनिबार भएको छ । साधारण सभाको उद्घाटन गर्दै पोखरा महानगरपालिका वडा नं १३ का वडाध्यक्ष किरण बरालले कृषकहरुले उत्पादन गर्ने हरेक कृषि उत्पादनलाई हाट बजार सञ्चालन गरेर बजारको ग्यारेन्टी गर्ने बताए । उनले भने, ‘तपाईंहरु उत्पादन मात्र गर्नुहोस्, बिक्रीको जिम्मा म लिन्छु ।’

किसानको उत्पादनलाई कहिं कतै खेर जान नदिने उनले प्रतिवद्धता व्यक्त गरे । वडाध्यक्ष बरालले अब प्रत्येक शनिबार वडाभित्रै किसान र उपभोक्ताबीच खरिद बिक्री गर्ने हाट बजार सञ्चालन गरिने जानकारी पनि गराए । कृषकले उत्पादनमा जोड दिनुपर्ने भन्दै उनले वडाबाट कृषि उत्पादन गर्न कृषकलाई आवश्यक सहयोग उपलब्ध गराउँदै जाने उल्लेख गरे ।

आदर्श अर्गानिक कृषक समुहका अध्यक्ष शिवप्रसाद बरालको अध्यक्ष्यतामा भएको सधारण सभामा समूहका संस्थापक अध्यक्ष कृष्णप्रसाद सिग्देल, श्री मोहरपानी आदर्श टोल विकास संस्थाका अध्यक्ष श्रीराम सिग्देल, जागरण आमा समूहकी अध्यक्ष लक्ष्मीदेवी देवकोटा, नागेश्वर महादेव मन्दिर विकास समिति अध्यक्ष विष्णुप्रसाद बराल, सहेले सान्तेडाँडा सालघारी सामुदायिक वन उपभोक्ता समिति अध्यक्ष कृष्णप्रसाद बराल, समाजसेवी सुरेन्द्रप्रसाद बराल लगायतले शुभकामना व्यक्त गरे ।

सभाले समूहका अध्यक्ष शिवप्रसाद बराल र कोषाध्यक्ष श्रीराम बरालद्वारा प्रस्तुत वार्षिक प्रतिवेदन पारित गरेको छ । समूहकी उपाध्यक्ष सीता सिग्देलले स्वागत गरेको कार्यक्रमको सञ्चालन सचिव राजन सिग्देलले गरेका थिए ।