पोखरा । नेपाल खानेपानी संस्थानका महाप्रबन्धक ईश्वर प्रसादले कर्मचारीलाई अनुशासनमा रहेर कार्यालय प्रमुखले दिएको जिम्मेवारी पूरा गर्न निर्देशन दिएका छन् । जापान सरकार जाइकाको अनुदान तथा नेपाल सरकारको तर्फबाट खानेपानी संस्थानलाई ऋण अनुदानमा निर्माण भइरहेको पोखरा खानेपानी सुधार आयोजनाको कामको विवरण बुझ्न पोखरा आएका उनले निर्देशन दिएका हुन् ।
खानेपानी संस्थान पोखरा शाखामा भएको स्वागत तथा सम्मान कार्यक्रममा उनले करार तथा ज्यालादारीमा कार्यरत कर्मचारीलाई स्थायी गर्ने प्रक्रियामा लैजाने बताए । महाप्रबन्धक ईश्वरले कामचोर तथा हाजिर गरेको भरमा संस्थानको जिम्मेवारी लिएको भए संस्थान छोड्नसमेत चेतावनी दिए । व्यवस्थापन, सञ्चालक समिति र कर्मचारी सबैको दायित्व आ–आफ्ना ठाउँमा बराबर भएको भन्दै जिम्मेवारीको भूमिका निभाउन सक्नुपर्ने बताए ।
उनले व्यवस्थापन र कर्मचारी मिलेमात्र संस्थान सबल बन्ने बताएका छन् । नेपाल खानेपानी संस्थान पोखरा शाखाका कार्यालय प्रमुख ई. आशीष कार्कीले उपभोक्तालाई सेवा दिने दायित्व संस्थान र कर्मचारीको भएकोले चुस्त दुरुस्त र प्रभावकारी सेवा दिनुपर्ने बताए ।
पोखरा शाखाअन्तर्गत विन्ध्यवासिनी इकाइ कार्यालय पुगेका महाप्रबन्धक ईश्वरलाई इकाइ कार्यालयले स्वागत गरेको इकाइ प्रमुख ई. सन्तोषकुमार दासले बताए ।