लमजुङ, ६ असार । लमजुङमा नेपाल रेडक्रस सोसाइटीको जिल्ला शाखाले जिल्लाका अपाङ्ग जीवन यापन गरिरहेकाहरूको आय आर्जनका लागि छ लाख सहयोग गरेको छ । दोदी गाउँपालिकामा रहेका तीन सय दुई जनालाई जनही २० हजारका दरले रकम वितरण गरेको हो ।

रेडक्रसको जिल्ला शाखाले दोर्दी गाउँपालिकाको छ वटा वटा वडामा रहेको तीन सय दुई अपाङ्गलाई त्यस्तो रकम वितरण गरेको शाखाका अध्यक्ष दिपक बरालले बताए । उनका अनुसार ती वडामा रहेका अपाङ्गको सशक्तिकरणका लागि टोलटोलमा स्वावलम्बन समूह गठन गर्न लगाई ती समूहले छनौट गरेका र तत्कालीन जिल्ला विकास समितिले गरीब भनेर पहिचान गरेको सूचिभित्र परेका व्यक्तिलाई उक्त रकम सहयोग गरिएको हो । उक्त रकम डेनिस रेडक्रसबाट नेपाल रेडक्रसको केन्द्रीय समिति मार्फत प्राप्त भएको बरालले बताए ।

एउटा स्वालम्बन समूहमा कम्तिमा १५ जना र बढीमा ३६ जनासम्म रहेका छन् । त्यो समूहले सिफारिस गरेका व्यक्तिहरूले आयआर्जनका लागि आफूले इच्छाएको यो काम गर्छु भन्ने प्रतिवद्धता व्यक्त गरेपछि उनीहरूलाई पहिलो किस्तामा १० हजार रुपैयाँ प्रदान गरिएको रेडक्रस शाखाका कार्यालय प्रमुख श्रीकान्त घिमिरेले बताए । उनका अनुसार पहिलो किस्ता लिएर कबोल गरे अनुसारको काम गरे नगरेको अनुगमन गरी तीन महिना पछि काम थालेका आधारमा पुनः १० हजार रुपैया थप गरिएको हो ।

त्यसरी, दोस्रो किस्ता समेत पाउनेको संख्या तीन सय दुई रहेको छ । उनीहरू कुल चार सय ६० जनाले सहयोगका लागि आवेदन गरेकामध्येबाट तीन सय दुई जना छनौट भएका हुन् घिमिरेले बताए । उनका अनुसार त्यसरी सहयोग रकम लिनेहरूले कसैले कुखुरा पालन, कसैले सिलाई मेसिनसहित कपडाको पसल, कसैले किनारा पसल, तरकारी खेती, भेडा पालन जस्ता काम गरेका छन् ।