पोखरा । सञ्चारिका समूह नेपाल गण्डकी प्रदेशको आयोजनामा डिजिटल साक्षरता अभियान अन्तरगत सूचना र प्रविधिमा महिलाको पहुँच विषयक तालिम भएको छ ।

मुख्यमन्त्री तथा मन्त्री परिषदको कार्यालय गण्डकीको सहयोगमा भएको तालिमको उद्घाटन गर्दै उपसभामुख बिनाकुमारी थापाले महिलाको क्षमता अभिवृद्धि गर्न यस्ता तालिमले महत्वपूर्ण भूमिका खेल्ने बताइन् । उनले तालिममा सिकेका कुरा दैनिक व्यवहारमा लागु गर्न आग्रह गर्दै तालिमको सफलताको शुभकामना व्यक्त गरिन । आफू नीति निर्माण गर्ने तहमा रहेको बताउँदै उनले महिला पत्रकारको क्षमता बृद्धि गर्ने सवालमा आफूले सक्दो सहयोग गर्ने प्रतिबद्धता जनाइन् । उपसभामुख थापाले सञ्चारमाध्यमवाट सही सूचना सम्प्रेषण हुनुपर्नेमा जोड दिइन् ।

तालिमको सहजीकरण गर्दै प्रेस काउन्सिलका सदस्य दुर्गा भण्डारीले सञ्चारध्यमबाट प्रशारण हुने सूचना तथ्यपरक हुनुपर्ने बताइन् । पछिल्लो समय नयाँ नयाँ प्रविधिको विस्तार भइरहेको बताउँदै उनले प्रविधिको सदुपयोग गर्न सके समयको वचतसँगै गुणस्तरीय कार्यसम्पादन गर्न सकिनेमा उनले जोड दिइन् ।

त्यस्तै फोटो पत्रकार प्रेम थापाले फोटो / भिडियो सुटिङ र सम्पादन सम्बन्धी प्रशिक्षण दिए । तालिममा विभिन्न सञ्चारमाध्यमा कार्यरत ४० जना पत्रकार महिलाको सहभागिता थियो ।

सञ्चारिका समूह नेपाल गण्डकी प्रदेशका अध्यक्ष कविता श्रेष्ठको अध्यक्षतामा भएको कार्यक्रम सञ्चालन कोषाध्यक्ष उमा आलेमगरले गरेकी थिइन् ।