पोखरा । सिद्धार्थ क्लब पोखराको आयोजनामा भएको एक कार्यक्रमबीच रुपा गाउँपालिका ४ सिद्ध ढुंगागाडेस्थित महेन्द्र आधारभूत विद्यालयका विद्यार्थीलाई पोसाक र स्टेसनरी वितरण गरिएको छ । विद्यालयका ३६ जना विद्यार्थीलाई सर्ट, पाइन्ट, फर्क २/२ जोरका साथै कापी, पेन्सिल, इरेजर, कटरलगायत सहयोग गरिएको हो । क्लबका पूर्व अध्यक्ष एवं समाजसेवी ज्ञानेश्वरराज श्रेष्ठबाट आफ्नो जन्मोत्सवको अवसरमा पोसाक सौजन्य गरेका हुन् ।

रुपा गाउँपालिका ४ का अध्यक्ष मुकुन्दबहादुर वंशीले सहयोग सामग्री वितरण गरे । उनले वितरण गरिएको सामग्रीको सदुपयोग गर्न र विद्यार्थीको पठनपाठनको वातावरण घरमा पनि निर्माण गरिदिन अभिभावकसँग आग्रह गरे ।

कार्यक्रममा सिद्धार्थ क्लबका अध्यक्ष इन्दिरा मर्सानी श्रेष्ठले विद्यालयमा विद्यार्थीको नियमितता र संख्या वृद्धि हुने विश्वास गरिन् । क्लबका पूर्व अध्यक्ष एवं समाजसेवी ज्ञानेश्वरराज श्रेष्ठले सहकार्य र सहयोगबाट सामाजिक रुपान्तरण र विकास सम्भव हुने भन्दै क्लबमार्फत् आफूले विद्यालयलाई सहयोग गर्ने प्रतिबद्धता जनाए । विद्यालयका प्रधानाध्यापक राजबहादुर वंशीले क्लबको सहयोगले विद्यार्थीको पठनपाठनमा सहयोग पुगेको उल्लेख गर्दै गुणस्तरीय शिक्षा प्रदान गर्न आफू प्रतिबद्ध रहेको बताए ।

क्लबका सचिव विनोद श्रेष्ठले सञ्चालन गरेको कार्यक्रममा प्रथम उपाध्यक्ष देवेन्द्र पराजुलीले स्वागत गरे ।