लेखनाथ । १९८१ साल जेठ २० गते धर्तीमा पाइला टेकेका पोखरा–२६ विजयपुर निवासी शताब्दी पुरुष विश्वनाथ रानाभाटको १०१ औं जन्मोत्सव मनाइएको छ ।
स्व. करुणाखर रानाभाटका ६ छोराहरूमध्येका एक मात्र जीवित ठुलाघरे कान्छो नामले चिनिने विश्वनाथको आइतवार विविध कार्यक्रमका साथ १०१ औं जन्मोत्सव मनाइएको हो ।

पूर्व सभामुख तारानाथ रानाभाटका कान्छा बुबासमेत रहेका विश्वनाथको जन्मोत्सवमा सद्भाव धार्मिक ¥याली, कुल देवताको दर्शन तथा परिक्रमा, वृक्षरोपण, जन्मघरको दर्शन र शुभ आशीर्वाद ग्रहणका कार्यक्रमहरू राखेर जन्मोत्सव मनाइएको थियो ।

विश्वनाथका ३ छोरा कृष्ण रानाभाट, ढकबहादुर रानाभाट र पुरुषोत्तम रानाभाटले बुबाको सम्मानमा राखेको कार्यक्रममा पोखरा २६ को विजयपुरदेखि बाजागाजासहित साँघुको मुख विजयपुरमा रहेको कुल मन्दिर र अर्ध नारेश्वर लक्ष्मी मन्दिरको परिक्रममा गरी ऐतिहासिक सिलिंगे डाँडाँमा सिलिंगे प्रजातिको बिरुवा रोपिएको थियो ।

विश्वनाथ रानाभाट जन्मिएको जन्मघरमा विश्रामपछि बाल्यकालमा खेलेका विभिन्न स्थानको परिक्रममा गरी पोखरा २६ को कालिकाचोकमा रहेको भाट समाज भवनमा आफन्तजन, राजनीतिकर्मी तथा सामाजिक व्यक्तित्वहरूलाई आशीर्वाद ग्रहण गराई जन्मोत्सव मनाएको छोरा देवेन्द्र रानाभाटले जानकारी दिए ।

‘गाउँमा बलको काम दलिन बोक्ने, बाटो तथा पानी पँधेरोमा ठूला ढुंगा राख्नेदेखि पशुपंक्षीलाई औषधी खुवाउनसमेत ठुलाघरे कान्छोका उपनामले चिनिएका विश्वनाथलाई नै बोलाउने प्रचलन थियो,’ स्थानीय ठाकुर रानाभाट बताए ।