पोखरा । राम्जा पोखरा सम्पर्क समाजको अध्यक्षमा धनेश्वरी पराजुली निर्वाचित भएकी छन् । शनिबार पोखरामा भएको नवौं साधारण सभा तथा पाँचौ अधिवेशनबाट वरिष्ठ उपाध्यक्षमा डम्बरबहादुर क्षेत्री, उपाध्यक्षमा राजेन्द्र तिमिल्सिना, सचिवमा तोयानाथ तिमिल्सिना, सहसचिवमा अर्जुन पौडेल, कोषाध्यक्षमा सूर्यप्रसाद पौडेल र सहकोषाध्यक्षमा डम्बरबहादुर केसी निर्वाचित गरेको छ ।

सदस्यमा गुमादेवी शर्मा, अनिरुद्र पौडेल, मनहरि चालिसे, पवित्रा शर्मा पौडेल, हिमाल तिमिल्सिना, लक्ष्मी पौडेल लामिछाने, सावित्री गौतम र मिना तिमिल्सिना निर्विरोध निर्वाचित भए । दलित र जनजातितर्फ छुट्टाइएको सदस्य पदमा भने कसैको पनि उम्मेद्वारी नपरेकोले उक्त पद रिक्त रहेको निर्वाचन मण्डलका संयोजक नगेन्द्रराज पौडेलले बताएका छन् । निर्वाचित पदाधिकारी तथा सदस्यहरुलाई प्रमाण पत्र प्रदान गर्नुका साथै निर्वाचन संयोजक पौडेलले शपथ खुवाएका थिए ।

समाजका अध्यक्ष मिना केसीको अध्यक्षतामा सम्पन्न साधरण सभामा प्रमुख अतिथि हरिप्रसाद भट्टराई, विशेष अतिथि पूर्व सांसद कृष्णप्रसाद भट्टराई, प्रधानमन्त्रीका प्रेसविज्ञ मनहरि तिमिल्सिनासमेतले समाजका गतिविधिको चर्चा गर्दै अधिवेशनको सफलतको कामना गरेका थिए ।

पर्वतको राम्जा देउराली, राम्जा चित्रे, राम्जा पकुवा र राम्जा तिलाहारबाट पोखरामा आई विभिन्न पेसा तथा व्यवसाय गरी बस्नेहरुको साझा थलो उक्त समाज हो । समाजमा हाल २ सय ६८ आजीवन सदस्य क्रियाशील छन् ।