पोखरा। पोखरामा ज्येष्ठ नागरिक मैत्री विविध सांस्कृतिक कार्यक्रम एवं भजन प्रतियोगिताको तयारी थालिएको छ ।

ज्येष्ठ नागरिक सरोकार समाज नेपालको आयोजनामा वैशाख १९, २० र २१ कार्यक्रम गर्न लागिएको हो । संस्थाको सहयोगार्थ जेष्ठ नागरिक मैत्री धार्मिक, सांस्कृतिक नाचगान र भजन कृतनसहितका विभिन्न मनोरञ्जनात्मक कार्यक्रम गर्न लागिएको कार्यक्रम मुल समिति संयोजक दुर्गाप्रसाद कोइरालाले जानकारी दिए ।

ज्येष्ठ नागरिकहरुका लागि आवश्यक स्वास्थ्य सुविधा, मनोरञ्जन, धार्मिक एवं आध्यात्मिक चिन्तन गर्ने साथै तिर्थयात्री तथा धर्मालम्बीहरुका लागि भौतिक लागि आवश्यक भौतिक संरचना निर्माण गर्नु कार्यक्रमको उद्देश्य रहेको संस्थाका अध्यक्ष भक्तराज श्रेष्ठले जानकारी दिए । साथै, संस्थाको कार्यालय परिसर भित्र शिव, बुद्ध, तथा विभिन्न देवी देवताको प्रतिमा स्थापना र नेपाली लोक भजन कृतनको संरक्षण र संवद्र्धन गर्ने लक्ष्य रहेको उनले बताए ।

संस्थाले ज्येष्ठ नागरिकहरुलाई आफ्नो हक अधिकार र नियमानुसार पाउने सुविधाबारे सचेत तुल्याउने काम गरिरहेको अध्यक्ष श्रेष्ठले बताए । उनीहरुमा भएको ज्ञान, सिप र अनुभवलाई नयाँ पुस्तामा हस्तान्तरणको व्यवस्था गर्ने, ज्येष्ठ नागरिक सेवाका विविध कार्यक्रम अघि बढाउने संस्थाको योजना रहेको उनले सुनाए ।

संस्थाको लक्ष्य उद्देश्य प्राप्तीका लागि कार्यक्रम गर्न लागिएको संस्थाका महासचिव विष्णुप्रसाद पौडेलले बताए । जसमा ख्यातीप्राप्त कलाकारको साथमा हिमाली सांस्कृतिक परिवारका कलाकारहरुको प्रस्तुती रहने उनको भनाइ थियो । भजन प्रतियोगितामा प्रजापती पराजुली र पुरुषोत्तम न्यौपानले सहयोग गर्ने उनले बताए ।