पोखरा । मादी १, खिलाङका महिलालाई नेतृत्व विकास तालिम दिइएको छ । वडा १ कार्यालय आयोजनामा ३ दिनसम्म आयोजित तालिम शुक्रबार सम्पन्न भयो ।

वडाध्यक्ष देवीजंग गुरुङले ग्रामीण क्षेत्रका अधिकांश महिलाको दिनचर्या चुलोचौको र घरधन्दामै बित्ने गरेको उल्लेख गर्दै नेतृत्वदायी भूमिकामा सक्षम बनाउन प्रयासस्वरुप तालिम आयोजना गरिएको बताए । उनले वडावासीले आफूलाई जिताएर पठाएकोले वडाभित्रका हरेक समस्याको सम्बोधन गर्नु आफ्नो कर्तव्य भएको बताए ।

खिलाङ आमा समुहका अध्यक्ष सुकुनादेवी गुरुङले आफ्नो परिचय भन्न पनि लजाउने महिलाहरुको समस्यालाई सम्बोधन गरी तालिम आयोजना गरेकोमा खुसी व्यक्त गरिन् । आगामी दिनमा सीपमूलक तालिम प्रदान गर्न आग्रह गरिन् ।

६९ वर्षीया प्रशिक्षार्थी चिजकुमारी गुरुङले सुरुको दिनमा जीवनमै पहिलो पटक अगाडि आएर माइक समाएको बताइन् ।

उनीहरुलाई दुर्गा रानामगर र कविता घर्तीमगरले प्रशिक्षण दिएका हुन् । तालिममा ५० जनाले भाग लिएका थिए । समूहका सचिव डिलमाया गुरुङले सञ्चालन गरेको समापन कार्यक्रममा वडा सदस्य प्रेमबहादुर गुरुङ, माया भुजेल लगायतको उपस्थिति थियो ।