पोखरा । पोखरा महानगरपालिका– १२ ले रक्तदान कार्यक्रम सम्पन्न गरेको छ । शुक्रबार कार्यालय परिसरमा गरिएको कार्यक्रममा ५३ युनिट रगत संकलन भएको हो । वडा कार्यालय र लायन्स क्लब अफ पोखरा आदर्श चौतारीको आयोजना तथा रक्त सञ्चार केन्द्रको प्राविधिक सहयोगमा रक्तदान कार्यक्रम राखिएको लायन्स क्लब अफ पोखरा आदर्श चौतारीका अध्यक्ष दामोदर आचार्यले बताए ।

कार्यक्रममा विभिन्न ठाउँबाट आएका मानिसहरूले रक्तदान गरेका थिए । रगतकै अभावले कोही पनि नागरिकले ज्यान गुमाउनु पर्ने अवस्था नआओस् भन्ने उद्देश्यले रक्तदान कार्यक्रम गरिएको वडाध्यक्ष सन्तोष बास्तोलाले बताए ।

‘रगतको अभाव नहोस् र रक्तदान जीवनदान हो भन्ने भावनाको विकास होस् भन्ने उद्देश्यका साथ कार्यक्रम गरिएको हो,’ उनले भने । पछिल्लो समय वडा कार्यालयले विकास निर्माणका कामसँगै सामाजिक कार्यक्रम पनि गर्दै आइरहेको छ ।