पोखरा । ज्येष्ठ नागरिकलाई संविधान र कानुनले विशेष सुविधा दिनुपर्ने उल्लेख गरेको छ । कानुनमै उल्लिखित सुविधा माग गर्दा उनीहरुले उल्टै अभद्र व्यवहार खेप्नु परेको छ । व्यावहारिकरुपमा अधिकार प्राप्तिका लागि पहल गरिदिनका लागि ज्येष्ठ नागरिक समाज गण्डकीले सरोकारवाला कार्यालयलाई ज्ञापन पत्र बुझाउने कामलाई निरन्तरता दिएको छ ।

गण्डकी प्रदेश सरकार, जिल्ला प्रशासन कार्यालय कास्की र पोखरा महानगरलाई अधिकारका लागि ज्ञापनपत्र बुझाएको समाजले जिल्ला प्रशासन कार्यालय पर्वत र कुश्मा नगरपालिकामा पनि ध्यानाकर्षण गराएको छ । अध्यक्ष धु्रवराज अधिकारी सचिव रामप्रसाद सुवेदी सहसचिव प्रेमलाल लम्साल, सदस्य भक्तराज सुवेदी र निवृत राष्ट्र सेवक समाज नेपाल पर्वतका अध्यक्ष वसन्त सिके समेतले ज्ञापनपत्र बुझाएका छन् ।

ज्येष्ठ नागरिकलाई औषध उपचार तथा सार्वजनिक यातायातमा राज्यले व्यवस्था गरेअनुरुपको छुट पाउनुपर्ने लगायतका १० बुँदे ज्ञापनपत्र ज्येष्ठ नागरिक समाजले अगाडि सारेको छ । यातायात र औषधोपचारमा परिचयपत्र आधारमा ५० प्रतिशत छुट दिइनुपर्ने, सरकारी अस्पतालमा टिकट लिनेदेखि डाक्टरले गर्ने परीक्षण, ल्याब, स्क्यान र औषधी लिने कक्षसम्म लाइन बस्नु नपर्ने व्यवस्था गर्ने लगायत माग मञ्चले अगाडि सारेको छ ।

आफूहरुले नेपालको संविधान र त्यस अनुरुप बनेका कानुनमा भएको व्यवस्था अनुरुप नै माग राखेको अध्यक्ष अधिकारीले बताए । उनले कानुनमा व्यवस्था गरिए पनि ज्येष्ठ नागरिकले अहिले पनि सार्वजनिक सवारीसाधन र अस्पतालमा अधिकार माग्दा दुव्र्यवहार भोग्नुपरेको पीडा सुनाए ।

ज्ञापन पत्र बुझ्दै पर्वतका प्रजिअ प्रेमप्रसाद आचार्य र उपमेयर स्वस्थानी रिजालले ज्येष्ठ नागरिकका समस्या सुनेको र आआफ्नोतर्फबाट प्रवाह हुने सेवासुविधामा ज्येष्ठ नागरिक प्राथमिकतामा पर्ने बताए । उनीहरुले उनले महानगरले ज्येष्ठ नागरिकका अधिकार व्यावहारिकरुपमा प्राप्तिका लागि केन्द्र सरकार, प्रदेश सरकार र सरकारका निकायसँग सहकार्य गर्ने आश्वासन दिए ।