पोखरा । ग्रीन डेभलपमेन्ट बैंक लिमिटेडको दशौं तथा एघारौं संयुक्त वार्षिक साधारणसभा चैत २७ गते सम्पन्न भएको छ । बैंकको सञ्चालक समितिका अध्यक्ष गणेशकुमार श्रेष्ठको अध्यक्षतामा भएको सभाबाट लेखापरीक्षकको प्रतिवेदनसहित आ.व.२०७८/७९ र २०७९/८० को वार्षिक वित्तीय विवरण, वासलात, नाफानोक्सान हिसाब र सोही आवको नगद प्रवाह विवरण, नाफानोक्सान बाँडफाँड हिसाब लगायत वित्तीय विवरणसँग सम्बन्धित अनुसूचीहरु सर्वसम्मत पारित भएको छ ।

बैंकको सञ्चित मुनाफा रकमबाट ३.८ प्रतिशत बोनस सेयर र सोमा लाग्ने कर प्रयोजनार्थ ०.२० प्रतिशत नगद लाभांश वितरण गर्ने प्रस्ताव उपर छलफल गरी पारित गरेको छ ।

बैंकको संस्थापक सेयर र सर्वसाधारण सेयरको अनुपात ५१ः४९ प्रतिशत कायम हुने प्रस्ताव पारित गरेको छ ।

संस्थापक शेयरधनीको प्रतिनिधित्व गर्ने ३ (तीन) जना सञ्चालकको निर्विरोध निर्वाचन सम्पन्न भएको छ । सभाले सर्वसाधारण शेयरधनीहरुको प्रतिनिधित्व गर्ने २ जना सञ्चालकको नियुक्ति अनुमोदन गरेको छ ।

सभाले आव २०८०÷०८१ को लेखापरीक्षण नियुक्ति गर्न बैंकको लेखापरीक्षण समितिद्वारा सिफारिस गरिएबमोजिम लेखापरीक्षक सुजन काफ्ले एन्ड एसोसियट्स चार्टड एकाउन्टेन्टलाई नियुक्ति गर्ने प्रस्ताव पारित गरेको छ ।

सेयरधनीले राखेका जिज्ञासाको जवाफ बैंकका अध्यक्ष गणेशकुमार श्रेष्ठ र प्रमुख कार्यकारी अधिकृत हरिबहादुर बुढाथोकीले दिएका थिए । सेयरधनीले राखेका जिज्ञासाको जवाफ दिँदै बैंकका प्रमुख कार्यकारी अधिकृत हरिबहादुर बुढाथोकीले चालु आर्थिक वर्षको स्वीकृत बजेट तथा कार्यक्रमअनुसार निर्धारण गरिएको लक्ष्य हासिल हुनेगरी कार्यक्रम सञ्चालन गरिएको जानकारी दिए । सेयरधनीलाई बैंक सञ्चालक सूर्यप्रसाद लम्सालले स्वागत र नायव प्रमुख कार्यकारी अधिकृत एवं कम्पनी सचिव प्रकाश गुरुङले कार्यक्रम सञ्चालन गरेका थिए ।