पोखरा । ग्रिन डेभलपमेन्ट बैंक लिमिटेडले आफ्ना सम्पूर्ण ग्राहक तथा कर्मचारीका लागि फिस्टेल हस्पिटल एन्ड रिसर्च सेन्टर प्रालिसँग विभिन्न स्वास्थ्य सेवा तथा सुविधामा छुट प्रदान गर्नेबारे सम्झौता गरेको छ ।

बैंकतर्फबाट सहायक महाप्रबन्धक संयुक्तबहादुर धाख्वा र अस्पतालतर्फबाट अध्यक्ष प्राडा भोला श्रेष्ठले सम्झौतापत्रमा हस्ताक्षर गरेका हुन् । सम्झौतासँगै बैंकका ग्राहक एवं कर्मचारीले अस्पतालबाट उपलब्ध सेवामध्ये डाक्टर परामर्श, युएसजी, युजिआई इन्डोस्कोपी, इसिजी, एक्सरे, सिटी स्क्यान, बेड चार्ज, ल्याब सेवामा ५ प्रतिशतसम्म छुट प्राप्त गर्न सक्नेछन् ।

पोखरा गैह्रापाटनस्थित उक्त हस्पिटलले अन्तर्राष्ट्रियस्तरको प्रविधि, उपकरण तथा अनुभवी डाक्टरबाट विभिन्न रोगको उपचार सुविधा दिँदै आएको छ ।

पोखरामा केन्द्रीय कार्यालय रहेको ग्रिन डेभलपमेन्ट बैंकले आफ्ना शाखा कार्यालय मार्फत मोबाइल बैंक, क्युआर कोड, आइपिएस, आइपिएस कनेक्ट, एटिएम÷डेबिट कार्ड, क्युआर लगायत डिजिटल बैंकिङ सुविधा तथा सर्वसुलभ कर्जा सेवा प्रदान गर्दै आएको छ ।