पोखरा । ‘स्वास्थ्य र पर्यटनको लागि हाइकिङ’ नाराका साथ हाइकर्स क्लब नेपालको आयोजनामा हाइकिङ भाग ३८ सम्पन्न भएको छ । हरेक महिनाको अन्तिम शनिबार हुँदै आएको हाइकिङ धम्पुसदेखि सुरु भइ याङ्जाकोट होमस्टे, धिताल, अस्ताम हँुदै हेमजा मिलनचोकसम्म भएको हो ।

क्लब अध्यक्ष कृष्ण रानाभाटले महिनाभर काममा व्यस्त रहने जागिरे, गृहिणी, विद्यार्थी, प्रोफेसर, डाक्टरलगायत सबै प्रकारका व्यक्ति समेटेर हाइकिङमा गरिएको बताए ।

हाइकिङमा ग्रामीण परिवेशको आनन्द लिँदै पर्यटकीय क्षेत्रहरुको अवलोकन गर्न महिला दिदीबहिनीको पनि उपस्थिति बढ्दै गएको क्लब उपाध्यक्ष ज्योति हमालले बताइन् । यो कार्यक्रम ४ वर्षदेखि निरन्तर छ । यसपालि करिब ४० जना सहभागी थिए ।

कास्की जिल्लामा मात्र नभएर छिमेकी तनहँु र स्याङ्जाका ग्रामीण भेगहरुमा पनि हाइकिङ गरिएको क्लबका आइटी विभाग प्रमुख पितम सेनले बताए ।