पोखरा । माउन्ट अन्नपूर्णमा मावि नदीपुरमा विविध कार्यक्रमहरुका साथ बालदिवस मनाइएको छ । विगतका वर्षझंै यसपालि पनि बालदिवसको अवसरमा प्रतिभा प्रस्फुटन कार्यक्रम भएका हो । प्रथम चरणबाट छनोट भएका २२ समूहले भाग लिएको कार्यक्रममा कविता, गीत र नृत्य प्रस्तुत गरिएको थियो ।

प्राचार्य सइन्द्र श्रेष्ठको अध्यक्षतामा सम्पन्न कार्यक्रममा विद्यालयका शैक्षिक निर्देशक अशोक श्रेष्ठले सम्पूर्ण भाइबहिनीमा सकरात्मक विचारको विकास होस् भन्दै सधै सत्यको मार्गमा हिड्ने प्रेरणा मिलोस् भनी शुभकामना व्यक्त गरे ।

विद्यालय सञ्चालक समितिका पूर्व अध्यक्ष चिजकाजी गुरुङले देशका कर्णधार विद्यार्थीहरूको शारीरिक मानसिक विकासमा विद्यालयले समय समयमा गर्ने यस्ता कार्यक्रमले टेवा पुग्ने बताए । विद्यालय संस्थापक तेज गुरुङले विद्यार्थी भित्र लुकेर रहेको प्रतिभा प्रस्फुटन हुने वातवरण निर्माण गर्न विद्यालयले हरसम्भव प्रयास गरिरहेको बताए ।

कार्यक्रममा संगीततर्फ निरञ्जन नेपाली प्रथम, इभाना आचार्य द्वितीय र एसिका सुनारले तृतीय भए ।

नृत्यतर्फ सिनियरमा निशान र दिपेश, रोशनी पुनको समूह र अनुषा छन्त्यालले क्रमश प्रथम द्वितीय र तृतीय स्थान हासिल गरे । नृत्यतर्फ नै जुनियरमा रिया सुनार, अनुष्का राई, दीक्षा पुनको समुहले क्रमश प्रथम द्वितीय र तृतीय स्थान हासिल गरे ।

कार्यक्रमको समापन गर्दै विद्यालयका प्राचार्य सइन्द्र श्रेष्ठले कार्यक्रम संयोजक शैक्षिक प्रमुख महादेव भण्डारी लगायत कार्यक्रम सफल बनाउन सहयोग गर्ने शिक्षक कर्मचारीलाई धन्यवाद दिए । विद्यालयकी शिक्षिका सेजल विजुक्छे र विद्यार्थी स्मृति, अर्पन, यश, एड्रिना लगायतले कार्यक्रम सञ्चालन गरेका थिए ।