पोखरा ।  ५/८ गोर्खा राइफल्स (सिरमुर) भूपू परिवार पोखराले ७८ औं तानविनगन दिवस मनाएको छ । दोस्रो विश्वयुद्धका क्रममा आफ्नो पल्टनले विजयी प्राप्त गरेको दिनको सम्झनामा उनीहरुको यो दिवस मनाएका हुन् ।

सन् १९४५ जुन ७ मा म्यानमारको तानविनगनमा ५/८ गोर्खा राइफल्स (सिरमुर)ले जापानमाथि विजयी हासिल गरेको थियो । सोही दिनको खुसीयालीमा पोखरामा रहेका सिरमुरका भूपू सैनिकहरु एक ठाउँमा भेला भएको परिवारका वरिष्ठ सल्लाहकार क्या. लालप्रसाद गुरुङले बताए । अग्रजको सम्मानसहित उनीहरुको बहादुरीको सिको गर्दै वीर लाहुरेका सन्तान नेपालमै पनि विभिन्न क्षेत्रमा सक्रिय हुनुपर्ने उनको भनाइ थियो ।

कार्यक्रममा ५/८ गोर्खा राइफल्स (सिरमुर) भूपू परिवार पोखराका अध्यक्ष ह.क्या. भुपरजंग गुरुङले आगामी २५ मार्चमा ५/८ गोर्खा राइफल्सका भारतीय भूपू सैनिक नेपाल आउने भएको तयारीमा लाग्न आग्रह गरेका थिए । संस्थाका प्रथम उपाध्यक्ष सु.मेजर धनप्रसाद शर्माले यो दिन पल्टनको गौरवमय इतिहास भएको बताए ।

भूपू परिवारका ९७ वर्षीय ज्येष्ठ नागरिक हवल्दार कुलबहादुर गुरुङको अध्यक्षतामा भएको सो कार्यक्रमको सञ्चालन सचिव सु.मे.मानध्वज गुरुङले गरेका थिए ।