लमजुङ । प्रथम भेट्रान फुटसल लमजुङ कपमा दोस्रो चरणअन्तर्गत बुधबार ३ खेल भए ।

बेसीसहरस्थित सहजी खेल मैदानमा सञ्चालित दोस्रो चरणको पहिलो खेलमा बुधबार लमजुङ मस्र्याङदी युवा क्लब विजयी भयो । सेने ग्यादरिङ फुटसल टिमलाई ३–० गोलअन्तरले हराउँदै ऊ तेस्रो चरणमा प्रवेश पाएको हो । दोस्रो खेलमा बिबि ब्वाई काठमाडौं विजयी भयो । उसले कमलडाँडा टिम हेटौंडालाई ३–१ गोल अन्तरले हरायो ।

तेस्रो खेल धुलपुरे बजार भोर्लेटार मध्यनेपाल–६ र खासुर रोधिं टिम सेसीसहर–१० खासुरका बीच भएको थियो । जसमा खासुर रोधिं टिम २–० अन्तरले अघि बढेको आयोजक संस्थाका खेल संयोजक सूर्यमान गुरुङले बताए ।

सेभेन ए साइडमा प्रतियोगिता सञ्चालन गरिए पनि खेल फिफा नियम अनुसार खेलाइएको छ । विजेताले ५० हजार र उपविजेताले २५ हजार साथमा ट्रफी, मेडल र प्रमाणपत्र पाउने छन् । उत्कृष्ट खेलाडी र सर्वाधिक गोलकर्तालाई जनही २ हजार ५ सय र मायाको चिनो प्रदान गरिने छ । खेल सञ्चालनमा ३ लाख ६० हजार रुपैयाँ खर्च अनुुमान आयोजकको छ । खेलमा २६ टिमले भाग लिएका छन् ।