पोखरा । प्रदेश खेलकुद परिषद गण्डकीको आयोजना तथा गण्डकी प्रदेश हक्की संघ व्यवस्थापनमा शुक्रबारदेखि प्रदेशस्तरीय अन्तरजिल्ला हक्की प्रतियोगिता हुँदैछ ।

रामबजारस्थित भारतीय पेन्सन क्याम्पको खेल मैदानमा हुने दोस्रो संस्करणको प्रतियोगितामा गण्डकीका मनाङ, मुस्ताङ र लमजुङबाहेक ८ जिल्लाले सहभागिता जनाउने गण्डकी प्रदेश हक्की संघका अध्यक्ष दीपकबहादुर थापाले बताए ।

प्रतियोगितामा उत्कृष्ट प्रदर्शन गर्ने खेलाडी समेटेर १० औं राष्ट्रिय खेलकुदका लागि गण्डकी प्रदेशको हक्की टिम बनाइने थापाले बताए । अर्को वर्ष कर्णालीको सुर्खेतमा १० औं राष्ट्रिय खेलकुद हुँदैछ ।

विजेताले २० हजार, उपविजेताले १५ हजार र सहविजेताले १० हजार नगद, ट्रफी, मेडल र प्रमाणपत्र प्राप्त गर्ने छ ।

पहिलो संस्करणमा कास्की र तनहँु क्रमश विजेता र उपविजेता हुन् ।