पोखरा । मादी गठबन्धनका उम्मेदवारले चुनाव जितेपछि पालिकालाई सांस्कृतिक गाउँ बनाउने बताएका छन् । आधुनिक शैलीले मौलिक संस्कृतिक लोप हुँदै गएको भन्दै गठबन्धनका उम्मेदवारले चुनाव जितोन पालिकालाई सांस्कृतिक गाउँपालिका बनाउने पहल गर्ने बताएका हुन् ।

मादी ७ महघारी र मादी ६, तप्राङमा भएको चुनावी सभामा मादी गाउँपालिका अध्यक्ष पदका उम्मेदवार नेपाली कांग्रेसका देवीजंग गुरुङले चुनाव जितेपछि मादीको मौलिक संस्कृति जगेर्ना गर्ने प्रतिबद्धता जनाए । ‘मादी गाउँपालिका, सांस्कृतिक रुपमा धनी गाउँपालिका हो । अहिले आधुनिकताले यहाँको संस्कृति हराउँदै गएको छ, हामीले चुनाव जितेपछि त्यसलाई जोगाउन लाग्छौं,’ उनले भने ।
मादीको संस्कृति जगेर्ना गरेर पर्यटनसँग जोड्ने उनले बताए । ‘पुरानो संस्कृति जोगाउनुपर्ने त हाम्रो कर्तव्य नै हो । त्यसलाई जोगाउँदै पर्यटनसँग जोडेर, पर्यटकीय नमुना गाउँ बनाउन हामीले पहल गर्ने छौं,’ उनले भने ।

गठबन्धनकै उपाध्यक्ष पदका उम्मेदवार नेकपा माओवादी केन्द्रका लालबहादुर गुरुङले संविधान रक्षा गर्न गठबन्धन एक ढिक्का भएर लागेजस्तै मादी बनाउन पनि लाग्ने बताए । सबै दलको सहमतिमा बजेट विनियोजन हुने भए पनि विपक्षी दलले आफैंले छुट्याए जसरी प्रचार गरेकोमा उनले आपत्ति प्रकट गरे । गाउँपालिका विकासका लागि सबैको समन्वय जरुरी रहेको बताउँदै उनले गठबन्धनका उम्मेदवारलाई जिताउन आग्रह गरे ।

नेपाली कांग्रेस कास्कीका पूर्व सभापति एवं कांग्रेस नेता कृष्ण केसीले गठबन्धनका उम्मेदवारलाई जिताउन मतदातासामु आग्रह गरे । चुनावमा गठबन्धनलाई जिताएर मादीलाई जिताउन मतदातामाझ उनको आग्रह थियो ।

मादी ६ वडा सदस्य पदका उम्मेदवार खेमबहादुर जिसीले चुनावपछि वडामा खेलकुद, शिक्षा, स्वास्थ्यमा जोड दिने बताए । वडा र गाउँपालिका विकासका लागि सबै दलको उत्तिकै भूमिका रहने हुँदा निषेधको राजनीति बन्द हुनुपर्ने उनको भनाइ थियो । मादी गाउँपालिका र वडा नम्बर ६ लाई समृद्ध बनाउने भिजन गठबन्धनसँग मात्र रहेको बताउँदै उनले गठबन्धनका सबै उम्मेदवारहरुलाई जिताउनुपर्नेमा जोड दिए ।