घुमफिरमा निस्कने पर्यटकहरु अहिले सहरी क्षेत्रमा भन्दा प्राकृतिक क्षेत्र रुचाउँछन् । धुवाँ, धुलो, फोहोरजस्ता प्रतिकूल वातावरणका कारण पर्यटकहरुले प्राकृतिक वातावरण रुचाउन थालेका छन् । पछिल्लो समय ग्रामीण पर्यटकहरुले खासगरी नेपालको संस्कृति, प्रकृति र परम्पराको अध्ययनमा रुचि देखाउन थालेका छन । पर्यटनको लागि संस्कृति, धार्मिक र प्रकृति उत्तिकै महत्वका विषय हुन्छन् ।
सुदूरपश्चिम प्रदेशको डोटी, अछाम, बझाङ र बाजुरा ४ वटा जिल्लाको संगमस्थलमा रहेको खप्तड क्षेत्र अहिले पर्यटकहरुका लागि गन्तव्य बन्न थालेको छ । खप्तड राष्ट्रिय निकुञ्जलाई प्राकृतिक सौन्दर्यताको खानी मानिन्छ । खप्तडलाई धर्तीको स्वर्गको उपमा पनि दिइएको छ । प्राकृतिक, धार्मिक र सांस्कृतिक विविधताले भरिपूर्ण खप्तडमा २२ वटा ठूला पाटन र ५२ वटा झोता अर्थात् रुखका थुम्काहरु रहेका छन् । खप्तड प्रकृति प्रेमी पर्यटकहरुको लागि रमणीय मानिन्छ । सरकारले विसं. २०४३ सालमा २ सय २५ वर्ग किलोमिटर क्षेत्र समेटेर खप्तड राष्ट्रिय निकुञ्ज बनाएपछि खप्तडको संरक्षण भएको छ । खप्तड हिमाली क्षेत्रदेखि चुरे शृंखलासम्म फैलिएको छ । पहिला खप्तड गाउँलेको चरिचरण क्षेत्रमात्र थियो भने अहिले निकुञ्जले बाजुरा, डोटी, बझाङ र अछामको भूमि समेटेको छ । खप्तड राष्ट्रिय निकुञ्जको उचाइ १ हजार २ सय ६२ देखि ३ हजार २ सय ७६ मिटरसम्म रहेको छ । निकुञ्ज मुख्यालयलाई केन्द्र मानेर त्रिवेणीधाम, खप्तड बाबा आश्रम, खापर दह, सहस्र लिंग र घोडा दाउने पाटन घुमफिर गर्न पर्यटकलाई २ दिन लाग्दछ । त्रिवेणीधाम गंगा, जमुना र सरस्वती नदीको संगम स्थल हो । खापर दहलाई फन्को मार्दाको मज्जा पर्यटकहरुका लागि छुट्टै हुन्छ । पर्यटकहरुका लागि खप्तडमा सुविधायुक्त होटल, लज र रेस्टुँरा छैनन् । खप्तडमा सेनाको गुल्म रहेको छ ।
खप्तडको अर्काे आकर्षण भनेको खप्तड बाबाको आश्रम हो, जहाँ उनको मूर्ति र उनले प्रयोग गरेका केही सामान छन् । खप्तड बाबाले खप्तडमा ५० वर्ष बिताएर विभिन्न पुस्तकहरु लेखेका थिए । उनले अन्वेषण गरेर बनाएका कयौं औषधी अझै सुरक्षित रहेछन् । खप्तडमा राजा वीरेन्द्र, रानी ऐश्वर्यको सुत्ने कोठा, प्रयोग गर्ने सामग्री र हेलिप्याड पनि रहेको छ । खप्तड बाबाको आश्रमछेउमा सिसाखानी रहेछ । आश्रम वरिपरि पुच्छर नभएका अनौठा मुसा देखिन्छन् । त्यस्तै केदार ढुंगा, खापर दह, नाट्यश्वरी, निकुञ्ज प्रशासनको संग्रहालय आदिको अवलोकन पर्यटकहरुले गर्न सक्दछन् । छिनछिनममा पानी र घाम लाग्ने खप्तडमा बादलले रुखहरुलाई ढाक्दाको समयमा वातावरण अर्कै देखिन्छ । निकुञ्जमा खासगरी वैशाखदेखि मंसिरसम्म पर्यटकहरु घुमफिरका लागि जाने भए पनि बर्खामा लाग्ने गंगा दशहरा मेलामा खप्तडमा विशेष भीड हुने गर्दछ । रंगीबिरंगी गुराँस फुल्ने मौसम र भुइँफूलले पाटन ढाकेको बेलाको वर्णन गरेरै सकिन्न । खप्तडको सुन्दर घाँसे मैदानमा पुग्नेबित्तिकै पर्यटकहरु। को यात्राको थकान मेटिन्छ घाँसे मैदानमा पल्टिएर आकाश हेर्दाको आनन्दको बयान गरेरै सकिन्न । हिउँमा खेल्न रमाउने पर्यटकहरुका लागि मंसिर, पुस र माघ उत्तम मौसम हुन्छ ।
पहिला खप्तड गाउँलेको चरिचरण क्षेत्रमात्र थियो भने अहिले निकुञ्जले बाजुरा, डोटी, बझाङ र अछामको भूमि समेटेको छ
खप्तड प्राकृतिक, धार्मिक, सांस्कृतिक र जैविक विविधताले भरिपूर्ण भए पनि भौतिक पूर्वाधार र प्रचार–प्रसारको कमी रहेको छ । तर पनि प्राकृतिक रुपमै रहेको भू–स्वर्ग जस्तै प्रकृति हेर्न खप्तड धेरै पर्यटक पुग्ने गर्दछन् । खप्तड घुमफिर गर्न चाहने पर्यटकहरुका लागि अध्यात्म, योग र ध्यान गर्न लायक गन्तव्य हो । ठूल–ठूला पाटन अर्थात चौर, दह, जीवजन्तु र हिमाल खप्तडको सौन्दर्य हो । खप्तडको प्रकृतिको सुन्दर पाटनमा पुग्दा मन हल्कामात्र होइन, तनाबबाट मुक्ति मिलेको पर्यटकलाई आभाष हुन्छ । आध्यात्मिक हिसाबले पनि महत्वपूर्ण छ खप्तड । परापूर्व कालमा युधिष्ठिर खप्तड हुँदै स्वर्ग गएका थिए भन्ने भनाइ छ । स्कन्द पुराणमा खप्तडको वर्णन पाइन्छ । खप्तडलाई स्थानीय भाषामा ‘खेचराद्री’ भनिन्छ । खेचरको अपभ्रंश हुँदै खप्तड भएको मानिन्छ । खप्तडमा त्रिवेणीधाम, सहस्रलिंग, केदारढुंगालगायत धार्मिक सम्पदा पनि छन् । त्रिवेणीधाममा गंगा दशहराका बेला जेठ–असारमा ठूलो मेला लाग्छ । रातभर देउडा नाचगान गरेर बिहान त्रिवेणीमा नुहाइधुवाइ गरेर तीर्थाटनका पर्यटक आफ्नो बाटो लाग्छन् । खप्तडमा वर्षैभरि घुमफिर गर्न सकिन्छ । जेठ, असार साउनमा खप्तडका पाटनहरु भुइँ फूलले ढक्कमक्क हुन्छन् । रंगीचंगी अनगिन्ती फूलहरु पाटनमा कार्पेट बिच्छ्याएझैं लाग्छन् । असोज, कात्तिक, मंसिर, पुस, माघ, फागुनसम्म हिउँले ढाकिएर खप्तड सुन्दर देखिन्छ । तराईबाट यति नजिक हिउँमा खेल्न पाइने अर्को ठाउँ नै छैन । चौतर्फी फूलेका लालीगुराँसले फागुन चैत, वैशाखमा खप्तड ध्वजापताकाले सिंगारेको बेहुली मण्डपझै लाग्छ । खप्तडमा ७ थरीका लालीगुराँस फुल्छन् । खप्तडको डाँफे कोट र भ्यु टावरबाट भारतको नन्दादेवी हिमालदेखि दार्चुलाको अपी, बझाङ सैपाल र बाजुराको बडी मालिकालगायत एक दर्जनभन्दा बढी हिमाल हेर्न पाइन्छन् ।
खप्तड पुगेपछि धेरै पर्यटकहरु खप्तड बाबाको जीवनीबारे जान्न चाहन्छन् । खप्तडमा ५० वर्ष बिताउनु भएका खप्तडबाबा आध्यात्मिक गुरु र विचारकका रुपमा चिनिनुहुन्छ । सन् १८८० मा भारतको कश्मीरको नेहरु परिवारमा जन्मनुभएका खप्तडबाबा विक्रम संवत् १९८६ मा नेपाल आउनु भएको थियो । संन्यास लिनुपूर्व उहाँ प्रतिभावान् डाक्टर हुनुहुन्थ्यो । उहाँले कोलकाता स्थित ट्रपिकल मेडिकल कलेजबाट एमबिबिएस र बेलायतबाट सर्जनको अध्ययन गर्नुभएको थियो । काशीको दक्षिणा मूर्ति मठमा रहेर पूर्वीय दर्शनको अध्ययन अध्यापनपश्चात् गहन साधनाका लागि नेपालको खप्तड लेक रोज्नु भएको थियो । खप्तडबाबाका विचार विज्ञान, स्वास्थ्य विज्ञान, धर्म विज्ञान सार संक्षेप म र मेरो कर्तव्य, नारीधर्म र पुरुष धर्म, योग विज्ञान, आत्मज्ञान, आरोग्य विज्ञान, वेदान्त विज्ञान एवं ३ ओटा अंग्रेजी पुस्तकसहित जम्मा १६ ओटा पुस्तक प्रकाशित छन् । प्रकाशित हुन नसकेका उहाँकै हस्तलिखित अरु थुप्रै कृतिहरु पनि छन । यी ग्रन्थहरुले पनि बाबाका विचार, सिद्धान्त, दर्शन र अनुभवलाई उजागर गरेको छ । वैदिक सिद्धान्त र दर्शनअनुरुपको कर्म, उपासना र ज्ञानलाई नै प्रतिपादन गर्ने यी ग्रन्थहरुमा प्रवेश गरेपछि बाबाको अध्ययन, अनुसन्धान र अनुभव कति महान्, कति गम्भीर, कति स्वाभाविक, कति उपकारी अनि कति अनुकरणीय रहेछन् भन्ने स्पष्ट हुन्छ । विचार विज्ञान त यति लोकप्रिय ग्रन्थ बनेको छ सामान्य पढे लेखेकादेखि लिएर ठूलाठूला दार्शनिक, वेदान्तीले पनि यी ग्रन्थ पढेपछि अत्यन्त प्रभावित भएका छन । खप्तड बाबा महान् तपस्वी, ज्ञानी, त्यागी, योगी, लेखक, साधक हुनुहुन्थो । पहिला खप्तड लेक पहाड र जंगलमात्र थियो । अहिले खप्तडसँग खप्तडबाबा गाँसिनुभएको छ । बाबाका कारणले खप्तडले पवित्रताको, सत्यताको, ज्ञानको ज्योति पाएको छ । खप्तडबाबाको विक्रम संवत् २०५३ साल जेष्ठ कृष्ण सप्तमीका दिन ब्रह्मलीन हुनु भएको हो ।
खप्तड बाबाले तपस्या गरेको पवित्र ठाउँ भएकाले खप्तड प्राकृतिक दृष्टिले मात्र नभएर तीर्थाटन पर्यटन र पर्या पर्यटनको हिसाबले पनि खप्तड पर्यटनका लागि गन्तब्य बनेको छ । खप्तड लेकमा २ सय ६० प्रजातीका चराहरु, ५ सय किसिमका जडिबुटी, विभिन्न किसिमका फूलहरुले सिंगारिएको खप्तड धर्तीकै स्वर्ग भूमि भन्दा पनि हुन्छ । जैविक विविधताले भरिपूर्ण यो ठाउँ प्रकृतिप्रेमी, अनुसन्धानकर्ता पर्यटकका लागि महत्वपूर्ण मानिन्छ । अहिले नेपाली सेनाले यसको संरक्षण गरी राखेको छ ।
पछिल्लो समय पर्यटकहरका लागि यतिखेर खप्तडबाबाको आश्रमस्थललाई संग्रहालय बनाइएको छ । संग्रहालयमा बाबाले प्रयोग गरेका कपडा, लत्ता, जुत्ता, पादुका, ओछ्यानको रुपमा प्रयोग गरेका मृग, बाघ, भालु, कस्तुरी आदिका छाला, संगीतका साधन पर्यटकले हेर्न पाउँछन् । समग्रमा खप्तड आफैं प्रकृतिको एक जीवित संग्रहालय मानिन्छ । क्षेत्रमा सुर्मा काली, बढीमालिका र अन्य मन्दिरहरु पनि छन् । खप्तडमा पुराना मठमन्दिरका भग्नावशेषहरु पनि पर्यटकहरुले अवलोकन गर्न सक्छन् । खप्तड सांस्कृतिक, प्राकृतिक, धार्मिक एवं ऐतिहासिक दृष्टिकोणले अति महत्वपूर्ण मानिन्छ ।
खप्तड क्षेत्रमा चारैतिर घनघोर जंगल र बीचमा ठूला फाँट छन् । जैविक विविधताले भरिएको खप्तड क्षेत्रमा घाँसे मैदान, थुम्का, जंगलहरु, घोडादौड पाटन, खप्तडबाबाको कुटी, नागढुंगा क्षेत्र, बल्दजोडी भ्युटावर, त्रिवेणी, भीमघट्ट, भीमलौरी, सहर्षलिंग, गणेश पाटन, सीतापाइला, छिते ढुंगो मुख्य घुमफिरका ठाउँ हुन् । पर्यटकहरु खप्तड पुग्यो भने फर्कन मन गर्दैन । खप्तडको घुमफिरमा सुदूरपश्चिमका बझागं, बाजुरा, डोटी र अछाम जिल्लामा पाइला राख्न सकिन्छ ।
खप्तड क्षेत्रमा राष्ट्रिय निकुञ्ज, खप्तड क्षेत्र पर्यटन विकास समिति र नेपाली सेनाबाट यात्रीलाई धेरै सुविधाहरु दिइँदै आएको छ । तर निकुञ्जमा घुमफिर गर्न पाउने तर खान र बस्न नपाउने भएकाले केही समस्या भएको छ । सरकाले निश्चित मापदण्ड बनाएर अब खप्तडमा पर्यटकका लागि होटल सञ्चालनमा ल्याउन पर्दछ । अब पर्यटनको व्किास गर्न खप्तड क्षेत्रको साथै रामारोशन, बडिमालिका, मालीकार्जुन आदि ऐतिहासिक, धार्मिक र प्राकृतिक स्थलको सम्भावयता अध्ययन गरेर ग्रमीण पर्यटन स्थलको विकास हुन पर्दछ ।
Related News
सम्बन्धित समाचार
कास्की कांग्रेसको शिखर पुरूषको अवसान
जून ओर्लेको रात र त्यसको आलोक
नयाँ बिहानी: आदर्श समाजको २९ औं वर्ष
गण्डकी प्रदेश प्रशिक्षण प्रतिष्ठानका ४ वर्ष र आगामी कार्यदिशा
राणा कालमै हलो जोत्ने क्रान्तिकारी पं. मुक्तिनाथ
hero news full width
मुख्य समाचार
त्रासैत्रासमा तंग्रिदै कागबेनी
मनिपालमा अत्याधुनिक एमआरआई मेसिन
वैशाख १३, २०८११३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
वैशाख १३, २०८१कतारी अमिर स्वेदश फिर्ता : पोखरा–कतार उडान माग
वैशाख १३, २०८१कास्कीमा एसइई उत्तरपुस्तिका परीक्षण रोकियो
वैशाख १२, २०८१गण्डकीमा डायलाइसिसका लागि अब पालो कुर्न नपर्ने
वैशाख १२, २०८१