स्वासलाई हामी सित्तैमा पाएको जस्तो लाग्छ । तर हरेक स्वास सँग हामी हाम्रो प्राण साटेका हुन्छौं । स्वास भित्र तान्नुको अर्थ जीवन हो भने बाहिर फाल्नुको अर्थ मृत्यु हो । कसलाई के थाहा कुन सास बाहिर निस्के पछि फेरी भित्र जाने हो वा होइन ?
पृथ्वीमा रहेका हरेक जलचर, थलचर प्राणी वा रुख बिरुवाहरु सबैलाई बाँच्नका लागि आधारभूत कुरा केहि छ भने त्यो स्वास हो । बाँच्नका लागि खाना, पानी, हावा आवश्यक छ । खाना बिना हामी ६ महिना, पानी बिना केहि दिन बाँच्न सक्छौं तर हावा बिना हामी केहि मिनेट मात्र बाँच्न सक्छौं । स्वास केवल बाँच्नका लागि मात्र होईन यसले तन, मन, मस्तिष्क अनि आत्मालाई एक साथ बाँधेर राख्ने काम गर्छ । हाम्रो मस्तिष्क चंगा हो भने स्वास धागो हो । जति लामो धागो त्यति माथि उडान । डुलीरहने मनलाई एक चित्त राख्ने काम गर्छ स्वासले । यो जीवनको मूल मन्त्र स्वास, एक तालमा चल्छ । स्वासलाई हामी सित्तैमा पाएको जस्तो लाग्छ । तर हरेक स्वास संग हामी हाम्रो प्राण साटेका हुन्छौं । स्वास कसरी लिईन्छ ? कसैलाई सोध्ने हो भने, नाकबाट भित्र तान्ने अनि नाकबाट बाहिर फाल्ने । यहि हो स्वास । तर स्वास भित्र तान्नुको अर्थ जीवन हो भने बाहिर फाल्नुको अर्थ मृत्यु हो । कसलाई के थाहा कुन सास बाहिर निस्के पछि फेरी भित्र जाने हो वा होइन ? किन कि, स्वास तालमा चल्छ । त्यसैले स्वासको ताल बुझ्नु जरुरी छ किन कि हाम्रो जीवन पनि एक तालमा चल्छ । यो जीवन रुपी ताललाई लामो समय सम्म चलाई राख्नका लागि स्वासको तालसंग जीवनको ताल मिल्नु आवश्यक छ । यस हाम्रो जीवनको सबै भन्दा महत्वपूर्ण चीज स्वासको ताल मिलाउनका लागि आवश्यक छ योग ।
योगको अर्थ जोड्नु हो । हामी जून संसारमा छौं त्यहाँ दुई संसार छन् । हाम्रा बाहिरी आँखाले देख्ने संसार र भित्री आँखाले देख्ने संसार । आन्तरिक तथा बाहिरी संसार । यहि आन्तरिक तथा बाहिरी संसार जोड्नु नै योग हो । यस जगतका कुनै पनि प्राणीमा पाँच तत्वहरु हुन्छन् काम, क्रोध, लोभ, मोह र ईष्र्या । यी पाँच तत्वलाई सदुपयोग गरे जीवन सुखमय हुन्छ । शान्त हुन्छ । यसको सकारात्मक उपयोग गरे यसले हामीलाई ज्ञानी बनाउछ । कुनै पनि शब्दको दुई अर्थ हुने गर्दछन् एक शब्दको जस्ताको तस्तै अर्थ जो हर कोहिले बुझ्दछ तर अर्को भाव हुन्छ त्यो भाव बुझ्न हर कोहिको सम्भवको कुरा होइन । तर यी पाँच शब्दको भाव बुझेमा जीवन सफल हुन्छ । यसकालागि ध्यानी हुनु पर्छ । ध्यानी अर्थात योगाभ्यासक ।
योग परिचयः
भगवान शिव द्वारा अनुशरण गरिएको पद्धती योगको अर्थ सम्बन्ध हो । तर महर्षि पतञ्जलीको सिद्धान्त अनुसार चित्तको बृत्तिलाई वास्तविक निरोध गर्नु नै योग हो । हाम्रो अस्थिर मनलाई स्थिर बनाउनु नै योग हो । हाम्रो मनमा अनेक प्रकारका राम्रा नराम्रा विचारहरु आइनै रहन्छन् । भनिन्छ २४ घण्टामा मानिसको मस्तिष्कमा करिवन ५६,००० सोचहरु आउने जाने गर्छन् । यी सबै साँेचहरु सकारात्मक हुन जरुरी छैन । तर मानव मस्तिष्कले अधिकाँश नकारात्मक सोँचलाई छिटो तान्ने गर्दछ र त्यसैमा रोमलेर राखिदिन्छ । हाम्रा मनमा आउने तिनै नकारात्मक सोचहरुले हामीलाई मानसिक रोगी तथा अन्य शारिरीक रोगी समेत बनाउन सक्छ । यस पवबृत्तिबाट जोगिन मात्र एउटै उपाय योग हो । योग मानिस भित्र रहेको रोगलाई प्रतिरोध गर्छ । योग अज्ञानताबाट ज्ञान तर्फ, जड बाट चेतना तर्फ, निर्बलताबाट सवलता तर्फ, जीवनबाट ब्रम्ह, प्रत्यक्षबाट परोक्ष एवं सीमितबाट असिमित तर्फको आध्यात्मिक यात्रा हो । केही विद्वान ऋिषिमुनीले योगको अर्थ मिलन पनि हो भनेका छन् । संक्षेपमा भन्नुपर्दा आफ्नो इच्छा शक्तिलाई परआत्माको इच्छाशक्तिमा संयोग गर्नु, जीवात्मा र परमात्माको एकाकारको अवस्था नै योग हो ।
योग परापूर्व काल देखि नै अनुसरण गर्दै आइएको छ । श्रीमद्भगवतगीतामा पनि योगलाई मुख्य तीन प्रकारमा बाडिएको छ । कर्मयोग, ज्ञानयोग र भक्तियोग । यसरी गीतामा कसैले भक्तिपूर्वक गरेको कर्मलाई कर्मयोग भनिएको छ । यसैगरि यदि कोहि व्यक्ति भगवानको सानिध्य चाहिन्छ भने उसले भगवानको भक्ति गर्नु पर्छ ।
कोब्राआसन (भुजङ्आसन)
योगले के गराउँछ ?
कुनै समस्या बिना जीवनभर तन—मन बाटै स्वस्थ्य, तन्दूरुस्त, सुरक्षित रहन सिकाउँछ । यसका लागि मात्र शरिरका केहि क्रियाकलापहरु र स्वास लिने तरिकाका नियमहरुको पालना अनि अभ्यास गरे पुग्छ । हर बिहान योगअभ्यासले अनगिन्ति शारिरीक तथा मानसिक बीमारिहरुबाट बचाउँछ अनि मानसिक स्वास्थ्य सन्तुलन गर्छ जसले गर्दा आध्यात्मिक ज्ञानको माध्यम हुँदे आन्तिरिक शान्तिको माध्यमबाट शारिरीक शक्ति प्राप्त हुन्छ जसले काममा निखारता ल्याउँछ । योगका बिभिन्न आसनहरुले मानसिक अनि शारिरीक शक्ति साथमा असल हुन पनि सिकाउछ । यसले बौद्धिकतामा बृद्धि गराउँछ । भावनाहरुलाई उच्च गराउँदै कुनै पनि क्षेत्रमा एकाग्रता ल्याउन मदत गर्दछ ।
योगका प्रकार र फाइदाः
योग धेरै प्रकारका छन्ः राजयोग, कर्मयोग, ज्ञानयोग, भक्तियोग, अनि हठयोग । तर अधिकांश जव योगका कुरा गर्छन् त हठ योग हुने गर्छ । जसमा ताडासन, धनुषासन, भुजंगाशन, कपालभाँती अनि अनुलोम—बिलोम जस्ता केहि व्यायाम हुन्छन् । केहि मानिसमा सामान्य शरिर झुकाउनु औला हल्लाउनु स्वासलाई कण्ट्रोल गर्नु मात्र पनि गाह्रो हुन्छ । तर लगातार योग गर्नाले केहि समयमै यसको प्रभाव आफै महसूस गर्न सकिन्छ । आजकलको खानपान तथा रहनसहनका कारण मनिस रोगी बन्दै गइरहेका छन् । सामान्य रुपमा समेत अधिकांशमा देखिने जोडहरुको दुखाई घुडाको दुखाई जस्ताबाट समेत मुक्ति दिलाउछ योगले । हामीले जे ताकत होओस भन्ने चाहन्छौं त्यसै प्रकारको ध्यान योग गर्नु जरुरी छ । जस्तो कुनै फलामको काम गर्ने मानिसको हात लामो अनि बलियो हुन्छ भने पहाडका कुलीहरु वा हिमाल चढ्ने मानिसको खुट्टा बलियो हुने गर्छ । किनकी पेशा अनुसारको व्यायाम त्यहि अंगहरुमा हुने गर्दछ । अधिकांश विद्यार्थी वा कुर्सीमै बसेर दिनभरी काम गर्नु पर्ने मानिसको पूरा शरीर कमजोर हुने गर्दछ । त्यसैले शरिर बलिष्ठ गराउन व्यायाम अनि मन मस्तिष्क बलियो गराउन दैनिक योग गर्नु अति आवश्यक छ ।
योग र कसरतमा फरकः
कतिपय मानिसमा यो सोंच छ कि योग, व्यायाम, जिम, जुम्वा, साँझ बिहानको हिँडाई घरको काम जे गरे पनि एकै समान हो । जसरी पनि शरिरलाई चलाउनु पर्छ । तर त्यसो होइन । योग कसरत अनि जिम सबै एकै हुन् भन्नेहरु पनि पाईएको छ । तर यी सबै निकै फरक छन् । एक एउटै अर्थमा छन् कि जे गरे पनि शरिर नै प्रयोग हुन्छ । तर योगमा शारिरीक, मानसिक, अनि भावनात्मक प्रक्रिया हुन्छ ।
योगसँग अन्य शारिरीक व्यायामको फरकः
ब्यायाम हरेक उमेरका मानिस अनि बिरामी, गर्भवती, बृद्धले गर्न सक्दैनन् । तर योग सबैले गर्न सक्छन् ।
योग गर्दा आफ्नो सास अनि आसनमा ध्यान गर्नु पर्ने हुन्छ जसले गर्दा शरिरप्रति जागरुकता बढ्ेको हुन्छ तर ब्यायाम गर्दा स्वासमा केन्द्रित हुनु पर्दैन ।
योग गर्दा शारिरीक उर्जा बिस्तारै खर्च हुदै न थाकीकन हाम्रो उर्जा शरिरले नै सोस्न थाल्दछ तर व्यायाम गर्दा शरिरको शक्ति चाडो खर्च हुन्छ र थकान महसूस हुन्छ ।
योगका लागि मात्र एक चकटी अनि थोरै ठाउँ भए पुग्छ शरिर जमीन संग टासिन्छ अनि जमीन संगको सामीप्यताको महत्व त सबैलाई थाहा छ । तर व्यायामका लागि अत्यधिक साधन सामान र स्थान पनि आवश्यक पर्छ ।
योगले साँसमा ध्यान दिन अनि सन्तुलन कायम गर्न सिकाउँछ जसले शरिरको पनि सन्तुलन हुन्छ । तर व्यायाममा साँसमा ध्यान दिनु पर्दैन ।
योगले शारिरीक, मानसिक तथा भावनात्मक रुपमा मानिस बलियो हुँदै जान्छन् । तर व्यायाममा मात्र शारिरीक बलिष्ठताको बृद्धि हुन्छ ।
योग गर्नाले पाचन शक्ति बढाउछ र बिस्तारै खानाको उर्जा शरिरमा पठाउछ अनि भोक कम लाग्छ जसले मानिस थोरै खान थाल्छ । तर व्यायामले खाना चाँडो पचाउँछ जसले मानिस अधिक खाने गर्छ ।
योग बिस्तारै गरिन्छ जसले सहनशीलता बढाउँछ । योग गर्नाले मांसपेशी कमजोर हुदैनन् । व्यायाम गर्नेले चाँडो प्रतिफल चाहन्छन् जसकारण मांसपेशीमा हानी पनि हुन सक्छ ।
नाडीसोधना प्रणायाम
योगका बिश्व बिख्यात हस्तिहरुः
योगलाई संसारमा बिगत ५००० बर्ष देखि परिचित गराइएको छ । विगतमा योग गराउने व्यक्तिलाई जोगी वा योगी भनिन्थ्यो तर अहिले योग गुरुहरु एक विश्व विख्यात सेलिब्रेटी बन्नुभएको छ ।
तिरुमालाई कृष्णमाचार्य
उहाँले ह्रिदयलाई कसरी नियन्त्रण गर्ने भन्ने कुरालाई भारत बर्षमा परिचित गराउनु भयो । उहाँले योगा र आयुर्वेद प्रयोग गरेर मानिसलाई निरोगी गराउन हाथा योगा को प्रतिपादन गर्नु भयो ।
स्वामी शिवानन्द
उहाँका अनुसार एक योगीले योगमा हास्य, गीत, जीवनका गुण समावेश गर्नु पर्छ अनि योगी एक डाक्टर पनि हुनु पर्छ भन्नुभएको छ । उहाँले हठयोग, कर्मयोग र मास्टरयोगलाई जोडेर ट्रिनिटी योग अर्थात त्रिमुर्ति योगको प्रतिपादन गरेर सिकाउनु भयो ।
बि के यस ल्याएंगर
टी कृष्णमाचार्यका शिष्य जसले योगलाई विदेशमा लोकप्रिय गराउने प्रथम मानिस हुनुहुन्छ । वचपनमा धेरै रोगहरुसँग सामना गरेका बि के यस शारिरीक रुपमा निकै कमजोर हुनुभयो । पछि पतंजलीका योगाभ्यास सूत्रहरुले आफू पनि स्वस्थहुनु भयो साथमा संसारलाई अयंगर योगा दिनुभयो । उहाँ ९५ बर्षको उमेरमा ब्रम्हलीन हुनु भयो ।
के पत्ताभी जोइस
अष्टांग भिनासा योगाका प्रतिपादक जुन कोरुण्टा भन्ने पुरानो सिकाईमा आधारित छ । उहाँको यस योगा विधिले मडोना, स्टिंग र ग्वेनेथ पाल्त्रो जस्ता प्रतिष्ठित व्यक्तिहरुलाई आकर्षित गरेको छ ।
महर्षि महेश योगी
उहाँले पारदर्शी ध्यान प्रबिधिको विकास गर्नुभयो । आँखा बन्द गरेर मन्त्रमा ध्यान दिदै एकाग्रता हुनु यसको बिशेषता हो । यसले एकाग्रता शक्ति बढाउँछ । यसले मस्तिष्कलाई आराम दिन्छ र तनावको स्तर कम गर्दछ ।
परमहंस योगानन्द
उहाँले पश्चिमा मुलुकलाई ध्यान र योगक्रियाको शिक्षा दिनुभयो । उहाँको योग क्रियाले मानिसको अनन्तको साथ र एकतामा जोड दिन्छ ।
जग्गी वासुदेव (सद्गुरु)
कर्नाटकबाट आउनुभएको परोपकारी मानिस जसले इशा फाउण्डेसनको स्थापना गरी विश्वभरी योगका कार्यक्रमहरु प्रदान गर्नुभएको छ । उहाँको सबैभन्दा राम्रो कुरा जीवनभरी कैदिहरुको लागि कार्यक्रमहरु संचालन गर्दछ ।
श्री श्री रवि शंकर
आर्टअफ लिभिङ फाउण्डेशनका संस्थापक जसले लयबद्ध सासको अभ्यासलाई लोकप्रिय बनाउनुभएको छ । यस अभ्यासलाई सुदर्शन क्रियाको नामले चिनिन्छ । उहाँका क्रियाहरु मध्ये एक कर्नाटकको भद्रा नदिको किनारमा गरिने १० दिन लामो अवधिको कवितामय स्वास प्रक्रियाको मौन अभ्यास उहाँको प्रचलित क्रिया रहेको छ ।
बाबा रामदेव
उहाँको आगमन बर्तमान युगमा संसारका लागि महत्वपूर्ण अंग साबित भएको छ । उहाँले सबै भन्दा पहिला टिभीको माध्यमबाट सर्ब प्रथम एक साथ संसारलाई बिहान ५ बजे उठाएर योग गर्न सिकाउनु भयो र योगलाई घरेलु बनाइदिनुभयो । हामीलाई कपालभाँती र अनुलोम बिलोमको धार्मिक अभ्यास गर्न सिकाउनुभयो । उहाँले सिकाएको अर्को कुरा योग गर्न सिकाउनु योगी वा जोगीको मात्र ठेक्का होइन यो सर्बसाधारणको पनि काम हो भन्दै योग गुरुहरु टोल टोलमा उत्पादन गर्नु भयो । उहाँले प्राक्रितिक घरेलु चीजहरु प्रशोधन गरेर औषधि पनि प्रस्तूत गर्नु भयो ।
त्यसैले यति लामो इतिहास तथा हस्तिहरुले् धानेको यस योगको संसार अवलम्बन गरि आफूलाई सुखि खुशी राखौं । जय योग ।
Related News
सम्बन्धित समाचार
‘स्व’ को खोजीमा प्रतीक्षा
गण्डकीमा विपद् जोखिमको अवस्था, पूर्वतयारी र न्यूनीकरण
नमच्चिने पिङको सय झड्का (हास्यव्यङ्ग्य निबन्ध)
बालकथा : मौकाको साटो
बुद्ध जयन्ती – एक चर्चा बुद्धशिक्षाको
hero news full width
मुख्य समाचार
रेवान पोखरामा विश्वराज
कर्जा विस्तार हुनेगरी मौद्रिक नीति ल्यायौंः गभर्नर अधिकारी
श्रावण ११, २०८१गायक तथा गीतकार एलपी जोशी रहेनन्
श्रावण ११, २०८१आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१