वालिङमा आगामी साता बैंकिङ/बीमा एक्स्पो हुने भएको छ। वित्तीय जागरण राष्ट्रिय अभियान अन्तर्गत जेठ २४ र २५ गते एक्स्पो हुने सोमबार वालिङमा आयोजित पत्रकार सम्मेलनमार्फत जानकारी दिइएको हो।

मिडिया इन्टरनेशनलको आयोजनामा हुने एक्स्पोमा नेपाल राष्ट्र बैंकको प्रवद्र्धन, बीमा समितिको सहकार्य तथा वालिङ उद्योग वाणिज्य संघको साझेदारीमा एक्स्पोको आयोजना गरिने भएको हो।

ग्रामीण अर्थतन्त्रको विकास एवं लघुउद्यमशीलतालाई समेत प्रभावकारी बनाउने राष्ट्र बैंकको योजना अनुसार ‘सामाजिक सुरक्षा भत्ता बैंक खातामार्फत गर्ने र सबै नेपालीको बैंक खाता’ कार्यक्रमलाई सार्थकता दिने वित्तीय जागरणको मुख्य उद्देश्य रहेको वित्तीय जागरण राष्ट्रिय अभियानका संयोजक माधव निदोर्षले बताए। एक्स्पोमा वित्तीय व्यक्तिहरुसँग उद्यमशीलता, बैंकिङ बीमा लगायत विषयमा अन्तरक्रिया हुनेछ। एक्स्पोको नेपाल राष्ट्र बैंकका गभर्नर डा चिरञ्जीवी नेपालले उद्घाटन गर्ने कार्यक्रम छ। वालिङ नगर प्रमुख दिलीपप्रताप खाँणले अब हरेक मानिस उद्यमशिलतासँग जोडिनु आवश्यक रहेको बताए। “जबसम्म पैसालाई पुँजीमा रुपान्तरण गर्न सकिँदैन, तबसम्म आर्थिक विकासले गति लिँदैन, ’ नगर प्रमुख खाँणको भनाइ थियो।

कार्यक्रममा वालिङ उद्योग वाणिज्य संघका अध्यक्ष शोभाकान्त पौडेलले यस्ता विभिन्न वित्तीय जागरण कार्यक्रमले सर्वसाधारणलाई बैंक तथा वित्तीय संस्थाको पहुँचमा पुग्न सजिलो हुने भएकाले र वालिङले समृद्धि हासिल गर्ने बताए। कार्यक्रममा वित्तीय जागरण राष्ट्रिय अभियान संयोजक माधव निदोर्षले कार्यक्रमबारेमा प्रकाश पारेका थिए ।