पोखराको मालेपाटनमा विहीवारदेखि तेस्रो अभियान पुरुष भलिबल प्रतियोगिता शुरु भएको छ। स्थानीय अभियान युवा क्लबले मालेपाटन खेल मैदानमा आयोजना गरेको हो।

प्रतियोगिता उद्घाटन खेल लौरुक युथ क्लबले जितेको छ। लौरुकले चिल्लीबारलाई २५–१२, १७–२५ र २५–१७ ले जित्दै प्रतियोगितामा सुखद शुरुवात गरेको हो।

दोस्रो खेलमा वाराही माविले डायमण्ड स्कूललाई २५–१९ र २५–२१ को सोझो सेटमा हरायो। अन्तिम खेलमा जिब्रे ढुङ्गाा क्लबले साइनिङ्ग स्टार स्कुललाई वाकओभर दिएको छ।

पोखरा ५ का अध्यक्ष धनबहादुर नेपालीले प्रतियोगिता उद्घाटन गर्दै वडा जिल्ला हुँदै राष्ट्रिय खेलाडी उत्पादन गर्नुपर्नेमा जोड दिए। खेलले आपसी भाइचाराको विकास र उत्कृष्ट खेलाडी उत्पादन गर्ने उनको भनाइ थियो। महानगरपालिकाका प्रवक्तासमेत रहेका नेपालीले खेलका लागि आफू निरन्तर सहकार्य गर्न तयार रहेको प्रतिबद्धता जनाए।

कुल १४ टिमको सहभागिता रहेको प्रतियोगितामा शुक्रबार ७ खेल खेलाइने आयोजकले जनाएको छ। विजेताले नगद ५० हजार, उपविजेताले ३० हजार नगदसहित ट्रफी, मेडल, प्रमाणपत्र पुरस्कार पाउनेछ।

त्यस्तैगरी, वेस्ट सेटर, ब्लकर, स्पाइकर, प्लेयर, सर्भरलाई ट्रफी र प्रमाणपत्र दिने आयोजकले बताएको छ। अनुशासित टिमले प्रशंसापत्र पाउने छ।

क्लब अध्यक्ष मोहनबहादुर केसीको अध्यक्षतामा सम्पन्न प्रतियोगिताका संयोजक धमेर्न्द्रले स्वागत मन्तव्य र सचिव राजु गिरीले संचालन गरेका थिए।