पोखरा, १४  वैशाख । पोखरा–३ भित्र रहेका ज्येष्ठ नागरिकलाई सम्मान गरिएको छ । पोखरा–३ वडा कार्यलय, नेपाल नेत्रज्योती संघ र ज्येष्ठ नागरिक सम्मान समितिले वडाभित्र रहेका ७० वर्ष बढि उमेर पुगेका करिब एक सय २० जना ज्येष्ठ नागरिकहरुलाई दोसल्ला ओढाएर संयुक्त सम्मान गरेको हो ।

उक्त वडाका वडा अध्यक्ष रवीन्द्र प्रजूले बृद्ध राजकुमार भारी र सुभद्रादेवी उदासलाई सम्मान गर्दै कार्यक्रमको उद्घाटन गरेका हुन् । कार्यक्रममा नाट्य तथा संगीत प्रतिष्ठानका प्राज्ञ प्रजापति पराजुलीलाई सम्मान गरेको थियो । प्रज्ञा प्रतिष्ठानका प्राज्ञ सूर्य खड्का ‘विखर्ची’लाई समेत सम्मान गरिएको थियो ।

उक्त वडा कार्यलयमा रहेर लामो समय कार्य गरेको भन्दै वडा सचिव सबिता तामाङलाई सम्मानसहित विदाई गरिएको थियो । उक्त अवसरमा नयाँ सचिवका रुपमा कार्यभार सम्हाल्न आएकी मीना बराल पौडेललाई सम्मानसहित स्वागत गरेको थियो ।

कार्यक्रममा बोल्दै वडा अध्यक्ष प्रजूले आफ्नो वडाभित्र बालश्रम मुक्त गरिएको बताए । आफ्नो वडाभित्र कसैले बालबालिकाहरुलाई श्रममा लगाएको भेटे कानूनी कारवाही गरिने उल्लेख गरे ।
कार्यक्रममा सम्मानीत डा. राधेश्याम कायस्थ, वडा सदस्य लक्ष्मी पराजुली, नेकपा प्रतितनिधि राजकुमारी भुजेल र राप्रपा प्रतिनिधि मोतिराम शाक्यलगायतले बोलेका थिए ।

वडा अध्यक्ष रवीन्द्र प्रजूको अध्यक्षतामा भएको कार्र्यक्रममा नेत्रज्योती संघका अध्यक्ष नन्दु श्रेष्ठले स्वागत र कार्यक्रम समितिका सचिव सनकमान सिकेले कार्यक्रम संचालन गरेका थिए ।
आँखा परीक्षणमा १ सय ५० जनाको आँखा परीक्षण र उनीहरुलाई चस्मा एवं औषधी वितरण गरेको समितिका सचिव सनकमान सिकेले जानकारी दिए । सिकेका अनुसार १० जनाको मोतियाविन्दु शल्यक्रियाका लागि हिमालय आँखा अस्पतालमा रिफर गरिएको छ ।