लेखनाथ, २३ चैत। लेखनाथ सामुदायिक सेवा केन्द्र एवं सामुदायिक प्रहरी सेवाले आयोजना गरेको खुला रक्तदानमा ७३ युनिट रगत संकलन भएको छ।

लायन्स क्लब अफ पोखरा लेखनाथ सिटीको सहकार्यमा भएको सो कार्यक्रममा पहिलो रक्तदाता सेवा केन्द्रका अध्यक्ष रमेश ओझालाई कास्कीका प्रहरी प्रमुख प्रहरी उपरीक्षक (एसपी) ओमबहादुर रानाले ब्लडव्याग हस्तान्तरण गरी उद्घाटन गरे।

एसपी रानाले सेवाका भावनाले गरिने जुनसुकै कामलाई पनि समाजसेवा भनिने भएकाले सबैले सभ्य समाज निर्माणका लागि प्रभावकारी भूमिका निर्वाह गर्नुपर्ने सुझाव राखेका थिए।

समाजमा देखिएको लागुऔषध र विकृतिजन्य घटना न्यूनिकरण गर्नका लागि प्रहरी र जनता हातेमालो गरेर अगाडि बढ्नुपर्नेमा जोड दिँदै उनले नागरिक बर्दीबिनाको प्रहरी हुनुपर्ने धारणा राखेका थिए।

कार्यक्रममा वडा ३० का वडाध्यक्ष श्रीराम पोखरेलले तराई क्षेत्रमा आएको विपतमा पहाडमा बस्ने नेपालीले सहयोग गर्न सके वास्तविक रुपमा नेपालीपन देखिने विचार राखे।

वडा २७ का वडाध्यक्ष पूर्णकुमार गुरुङले सामुदायिक सेवा केन्द्रले युवालक्षित कार्यक्रम मार्फत लागु औषधको नियन्त्रणमा सहयोगीको भूमिका निर्वाह गर्न सक्नु पर्नेमा जोड दिएका थिए।

कार्यक्रममा संस्थापक अध्यक्ष मोती गिरी, लेखनाथ उद्योग बाणिज्य संघका अध्यक्ष कृष्णहरि भण्डारी, लायन्स क्लब अफ पोखरा लेखनाथ सिटीका अध्यक्ष रुद्ररमण रेग्मी र सेवा केन्द्रका सल्लाहकार टीकाराम पंगेनी लगायतले रक्तदान महत्वबारे प्रकाश पारेका थिए।

सेवा केन्द्रका अध्यक्ष रमेश ओझाको अध्यक्षतामा भएको सो कार्यक्रममा स्वागत मन्तव्य कार्यक्रम संयोजक कृष्णप्रसाद अधिकारी र संचालन सचिव त्रिलोचन लामिछानेले गरेका थिए।