खैरेनीटार, २० चैत । कृषि तथा पर्यटन प्रवद्र्धन, कला, सीप र संस्कृतिको संरक्षण गर्ने उदेश्यले खैरेनीटार महोत्सव गरिने भएको छ ।

तनहुँ उद्योग वाणिज्य संघ खैरेनीटार बजार इकाई र शुक्लागण्डकी नगरपालिकाको संयुक्त आयोजनामा उक्त महोत्सव गर्न लागिएको बुधवार आयोजित पत्रकार भेटघाटमा जानकारी दिइएको हो । महोत्सव यही चैत २२ देखि वैशाख दुई गतेसम्म चल्ने छ ।

उक्त महोत्सवको उद्घाटन नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले गर्ने भएका छन् । महोत्सव अवधिभर चार करोड पचास लाख रुपैयाँ बराबरको आर्थिक कारोबार हुने र दुई लाख भन्दा बढि दर्शकले महोत्सव अवलोकन गर्ने अपेक्षा राखिएको महोत्सव प्रचार प्रसार संयोजक हरिबहादुर थापाले जानकारी दिए ।

महोत्सववाट हुने मुनाफावाट सामाजिक विकास कोष निर्माण गरी समाज सेवामा खर्च गरिने समेत निर्माण गरिने तनहुँ उद्योग वाणिज्य संघका अध्यक्ष तथा महोत्सवका संरक्षक मानकजी श्रेष्ठले जानकारी दिए । महोत्सवमा विभिन्न प्रतियोगितामा उत्कृष्ट र विजेतालाई पुरस्कारको व्यवस्था समेत गरिएको बताइएको छ ।

महोत्सवमा विज्ञान प्रदर्शनी, बाल उद्यान, राष्ट्रिय तथा स्थानीय हास्य कलाकारहरुको प्रस्तुती रहने, जस्ता जानकारी समेत गराएइएको थियो ।