हेमजा, ११ चैत। दशौं राष्ट्रिय हेमजा आलु महोत्सव–२०७५ तयारी तीव्र पारिएको छ।

विष्णुपादुका क्लबको आयोजनामा चैत २२ देखि बैशाख १ सम्म स्थानीय विष्णुपादुका खेल मैदानमा महोत्सव हुँदैछ।

महोत्सव तयारीका लागि याम्दी, मिलनचोक, सापकोटा चोक, बुद्घचोक (तिब्वतीयन क्याम्प) र साझाचोकमा गरी पाँच ठाउँमा गेट निर्माण गरिसकिएको छ। कृषि विकास निदेर्शनालय गण्डकी प्रदेशले सहआयोजना गर्ने महोत्सवमा प्रधानमन्त्री कृषि आधुनिकीकरण परियोजना कार्यान्वयन इकाइ तरकारी सूपरजोन कास्कीको विशेष सहयोग, गोर्खा बु्रअरी नेपालको मुख्य प्रायोजन रहेको मुल समारोह समितिका महासचिव वसन्तकुमार श्रेष्ठले जानकारी दिए।

महोत्सव आकर्षणमा आलु तथा ताजा तरकारीको प्रदर्शनी, आलुको पहाड निर्माण, आलुका विभिन्न परिकार, विविध सांस्कृतिक कार्यक्रम, राष्ट्रियस्तरको कृषि दोहोरी गीत प्रतियोगिता, कृषि झाँकी प्रतियोगिता, पप कन्सर्ट, हास्य कलाकारका प्रस्तुति, जापानीय सुन्तला, च्याउ, कफी, चियाको बिक्री एवम् प्रदर्शनी, कृषि बीउबिजन तथा अन्य कृषि यन्त्रको प्रदर्शनी लगायत रहेका छन्।

हेमजामा उत्पादित आलु तथा अन्य ताजा तरकारीको प्रदर्शन तथा प्रचारप्रसार गर्ने, हेमजालाई व्यावसायिक कृषि क्षेत्रको रुपमा देश विदेशमा चिनाउने, कोल्ड स्टोर्स निर्माण गर्न पहल गर्ने, प्रधानमन्त्री कृषि आधुनिकीकरण परियोजनाअन्तर्गत विभिन्न समूहमा व्यवसायिक कृषि खेती सञ्चालन गर्न सहयोग तथा अभिप्रेरित गर्ने साथै क्लब भवन निर्माणमा पहल गर्ने उद्देश्यले महोत्सव गर्न लागिएको हो।

महोत्सवमा ४० वटा कृषि प्रदर्शनीका स्टल, १५ वटा कृषि उत्पादन बिक्री वितरण स्टल, ३५ वटा व्यापारिक स्टल, १५ वटा आलु तथा कृषि उत्पादनका परिकार स्टल, २ प्राथमिक उपचार, ५ बैकिङ कारोबार तथा ५ वटा मनोरञ्जन स्टल रहने मेला मूल आयोजक समितिका संयोजक कृष्ण खड्काले जानकारी दिए।